Anadolu Sadareti Mahkemesi 1 Numaralı Sicil (H. 1247-1250/ M. 1831-1834) cilt: 93, sayfa: 163 Hüküm no: 168 Orijinal metin no: [31b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bursa Hacı Sevinç mahallesinden Seyyid Mehmed b. Halil’in Arabayatağı adlı yerdeki sulama hakkına müdahalenin önlenmesi Ma‘rûz, Sâdır olan fermân-ı âlîlerine imtisâlen işbu arzuhâle merbût hâlâ mahrûse-i Bursa’da hilâfeten müvellâ hâkim-i şer‘-i şerîf olup Haremeynü’ş-şerîfeyn müfettişi vekîli olan müderrisîn-i kirâmdan Muhyizâde hafîdi fazîletlü es-Seyyid Ali Eşref dâ‘îlerinin şehr-i sâbık Muharremi’l-harâm’ın on üçüncü günü târihiyle müverrah mümzâ ve mahtûm mührü mutâbık bir kıt‘a hüccet-i şer‘iyesine nazar olundukda mahrûse-i mezbûrede Hacı Sevinç mahallesi sükkânından sahib-i arzuhâl Sırrî oğlu es-Seyyid Mehmed b. Halil nâm kimesne zîr-i nezâret-i ağa-yı Dârü’s-sa‘âdeti’ş-şerîfe’de âsûde evkāfdan ashâb-ı hayrâtdan merhûm Muhyiddin Bey Vakfı müstegallâtından mahrûse-i mezbûre zeylinde Arabayatağı nâm mahâlde kâin bâ-temessük-i mütevellî mutasarrıf olduğu bir kıt‘a dut hadîkasını bundan akdem bâ-re’y-i mütevellî âhara fâriğ olup ancak sâlifü’z-zikr Arabayatağı’nda cereyân eden çirkâb suyundan beher hafta Salı günü vakt-i subhdan vakt-i asra değin kezâlik bâ-temessük-i mütevellî mutasarrıf olduğu sakyını tasarrufunda ibkā etmiş iken mahrûse-i mezbûre mahallâtından Şehreküstü mahallesi sükkânından derûn-ı i‘lâmda ismi mezkûr es-Seyyid İbrahim b. Mustafa nâm kimesne ile sâir kesân yevm-i mezkûrda olan hakk-ı sakyına fuzûlî müdâhale etmeleriyle mahâllinde müfettiş efendi mûmâ-ileyh huzûrunda mezbûr es-Seyyid İbrahim ile ba‘de’t-terâfu‘ merkūm İbrahim’in ikrârıyla müdde‘î [32a] es-Seyyid Mehmed’in ber-vech-i muharrer âb-ı mezkûrdan vakt-i mu‘ayyene-i merkūmda hakk-ı saky olduğu zâhir ve mûcebiyle müdde‘î-i mezbûrun zikrolunan çirkâb suyundan vakt-i mu‘ayyene-i mezkûrede hakk-ı sakyına müdâhale etmemek üzere merkūm es-Seyyid İbrahim’e tenbîh olunduğu meâl-i hüccet-i mezkûreden müstebân ve sahib-i arzuhâl-i mezbûrun merkūm es-Seyyid İbrahim ile sâir kesânın bi-gayr-ı hakkın müdâhalelerinin men‘ u def‘i hâvî bâlâsı tuğrâ-yı garrâ ile mu‘anven bir kıt‘a fermân-ı âlîşân sudûru istid‘âsında olduğu meâl-i arzuhâlden nümâyân olmağla ber-vech-i müsted‘â fermân-ı âlîşân i‘tâsı iktizâ eylediği huzûr-ı âlîlerine i‘lâm olundu. Sene [12]49