Anadolu Sadareti Mahkemesi 1 Numaralı Sicil (H. 1247-1250/ M. 1831-1834) cilt: 93, sayfa: 165 Hüküm no: 171 Orijinal metin no: [32a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ankara kazası Hacı Arab mahallesindeki Ahî Şerefüddin camii imamı Mehmed b. Süleyman’ın görevini yapmadığından azledilerek yerine Reisülkurra es-Seyyid Hâfız İsmail Efendi’nin tayini Ma‘rûz, Sâdır olan fermân-ı âlîlerine imtisâlen arz ve derkenâra ba‘de’n-nazar medîne-i Ankara’da Hacı Arab mahallesinde vâki‘ Ahî Şerefüddin nâm sahibü’l-hayrın binâ eylediği câmi‘-i şerîfde yevmî on akçe vazîfe-i mu‘ayyene [ile] imâmet ciheti[ne] bâ-berât-ı âlî mutasarrıf olan Mehmed müddet-i medîdeden berü nâ-mevcûd olup yeri hâlî ve hizmet-i lâzımesi mu‘attal kaldığından yine medîne-i mezbûre sükkânından re’îsü’l-kurrâ es-Seyyid Hâfız İsmail Efendi bilâ-berât on seneden mütecâviz câmi‘-i mezkûrda edâ-i hizmetinde olduğundan her vechile dirâyet ve istihkākı olduğuna binâen merkūm Mehmed’in ref‘inden mezbûr İsmail Efendi’ye tevcîh olunması vakf-ı mezkûr mütevellîsi Ahmed dâ‘îlerinin mühr-i mutâbık arzıyla inhâ eder, fi’l-hakīka imâmet-i mezkûre vazîfe-i mersûmesiyle mezbûr Mehmed b. Süleyman’ın üzerinde olduğu derkenârdan müstebân ve husûs-ı mezkûra vukūf-ı tâmmı olan kazâ-i mezbûr ahâlîsinden Der-aliyye’de müsâfiren sâkinler es-Seyyid Ahmed b. İbrahim ve es-Seyyid Ali b. Abdullah ve Mehmed b. Ahmed nâm kimesneler huzûr-ı şer‘a celb ile keyfiyeti etrâfıyla suâl olundukda merkūm Mehmed’in yirmi dört seneden berü nâ-mevcûd olup hayat ve memâtı ma‘lûm olmamağla yerine erbâb-ı istihkākdan Hâfız Seyyid İsmail her vechile muhtâr-ı cemâ‘at olup el-yevm imâmet-i mezkûru edâ ve hizmetinde olduğu on dört seneden mütecâviz bilâ-berât merkūmândan herbiri alâ-tarîkı’ş-şehâde haber vermeleriyle imâmet-i mezkûre vazîfe-i ma‘lûmesiyle nâ-mevcûd olan merkūm Mehmed’in ref‘inden edâ-i hizmet eden erbâb-ı istihkākdan re’îsü’l-kurrâ es-Seyyid Hâfız İsmail dâ‘îlerine tevcîh ve yedine berat-ı şerîf-i âlîşân sadaka ve ihsân buyurulmak husûsu re’y-i sâmîlerine menût idiği huzûr-ı âlîlerine i‘lâm olundu. Fî 29 L sene [12]49