Anadolu Sadareti Mahkemesi 1 Numaralı Sicil (H. 1247-1250/ M. 1831-1834) cilt: 93, sayfa: 165 Hüküm no: 172 Orijinal metin no: [32b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gedagara kazası Yeni mahallede el-Hâc Ahmed’in yaptırdığı caminin imamı olan Hafız Seyyid Mehmed’in görevini oğlu Seyyid Hasan ile damadı Seyyid el-Hâc Hâfız Mehmed’e bırakması Ma‘rûz, Sâdır olan fermân-ı âlîlerine imtisâlen medîne-i Gedagara nâibi Alişan Efendi’nin işbu mühr-i mutâbık i‘lâmına ve derkenâra nazar olundukda medîne-i mezbûr mahallâtından Yeni mahallede vâki‘ medrese kurbünde vâki‘ el-Hâc Ahmed nâm sahibü’l-hayrın binâ eylediği câmi‘-i şerîfinde yevmî bir akçe vazîfe ile imâmet cihetine bâ-berât-ı âlî mutasarrıf olan Hâfız es-Seyyid Mehmed b. Mehmed nâm kimesne kendi hüsn-i rızâ ve ihtiyârıyla cihet-i mezkûru sulbî kebîr oğlu es-Seyyid Hasan ve dâmadı es-Seyyid el-Hâc Hâfız Mehmed b. İsmail’e kasr-ı yed edip mezbûrun kasr-ı yedinden merkūmâna ber-vech-i iştirâk tevcîh olunmasının i‘lâm-ı mezkûr meâlinden müstefâd olmağın fi’l-hakīka imâmet-i mezkûre merkūm Hâfız Mehmed b. Mehmed’in üzerinde olduğu derkenârdan müstebân olup merkūm Seyyid Hâfız Mehmed’in sahib-i berat olup kendi hüsn-i rızâ ve ihtiyârıyla cihet-i mezkûr sulbî oğlu Seyyid Hasan ve dâmadı Hâfız Mehmed’e kasr-ı yed eylediğini ve merkūmânın erbâb-ı istihkākdan idiği medîne-i mezbûr ahâlîsinden Der-aliyye’de müsâfiren sâkinler Halil Efendi b. Ali ve İsmail Efendi b. Salih nâm kimesnelerin alâ-tarîkı’ş-şehâde haber vermeleriyle mâ‘adâ dâmadı merkūm Hâfız Mehmed’in imâmete liyâkati lede’l-imtihân zâhir ve bedîdâr olmağın imâmet-i mezkûre fâriğ-i merkūm es-Seyyid Hâfız Mehmed’in kasr-ı yedinden sulbî oğlu merkūm Seyyid Hasan’a ve dâmadı mezbûr Hâfız Mehmed’e ale’l-iştirâk tevcîh ve atîk beratı kaleminden battala hıfz olunarak yedlerine müceddeden bir kıt‘a berat-ı şerîf-i âlîşân sadaka ve ihsân buyurulmak iktizâ eylediği huzûr-ı âlîlerine i‘lâm olundu. Fî 22 L sene [12]49