Balat Mahkemesi 2 Numaralı Sicil (H. 970 - 971 / M. 1563) cilt: 11, sayfa: 71 Hüküm no: 33 Orijinal metin no: [7a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Beytülmâl adına zapt edilen muhallefâttan mal talebi Oldur ki, Hâlâ Bezzâzistân kethüdâsı olan fahrü’l-akrân Ahmed Bey b. Abdülmennân nâm kimesne meclis-i şer‘-i şerîfde hâlâ mahmiye-i İstanbul’da Beytülmâl-i hâs emîni olan Mustafa Çelebi b. Behmen mahzarında takrîr-i da‘vâ edip bundan akdem maktûlen fevt olup muhallefâtı Beytülmâl-i mezkûrca zabt olunan Durak Çelebi b. Zeynelâbidin nâm kimesne yedinden satın almak için görmekle seksen bir adet dâne inci ve bir altın murassa‘ kemer kuşak almış idi. Katl olundukda sâir muhallefâtı bile Beytülmâl-i mezkûr için zabt olunmuşdur. Hâlâ taleb ederim dedikde gıbbe’s-suâl emîn-i mezbûr dahi fi’l-vâki‘ Beytülmâl-i mezkûr için mezbûr maktûlün esbâbı zabt olundukda zikr olunan inci ve kemer kuşak bile zabt olunmuşdur. Lâkin mezbûr müdde‘înin değildir deyû inkâr ile cevâb verecek müdde‘î-yi mezbûrun sıdk-ı makāline beyyine taleb olundukda udûl-i müslimînden Davud b. Abdullah ve Yakub b. Mehmed nâm kimesneler zikr olunan inci ve kemer kuşak mezbûr müdde‘înindir merkūm Durak Çelebi görmek için almıştır deyû gıbbe’l-istişhâd edâ-yı şehâdet-i şer‘iyye ettiklerinde şehâdetleri hayyiz-i kabûlde vâki‘ olup müdde‘î-i mezbûra zikr olunan incileri ve kemer kuşağı mezbûr Durak Çelebi’ye küllen ve ba‘zen satmayıp ve semeni kabz etmediğine ve bağışlamadığına yemîn verildikden sonra mûcebiyle hükm olundu. Tahrîren fî evâili Cumâdelûlâ sene 970. Şuhûdü’l-hâl: Hızır Çelebi el-kâtib, İbrahim Çelebi b. Ali Bey