Anadolu Sadareti Mahkemesi 1 Numaralı Sicil (H. 1247-1250/ M. 1831-1834) cilt: 93, sayfa: 175 Hüküm no: 185 Orijinal metin no: [34a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Divriği kazası Savrunbaba köyündeki Savrunbaba Zaviyesi zâviyedarlığının Ebûbekir b. Mahmud’un vefatıyla çocukları Ahmed Sabi ve Ali’ye tevcihi Ma‘rûz, Sâdır olan fermân-ı âlîlerine imtisâlen işbu arzuhâl ve derkenâra nazar olundukda Divriği kazâsında Savranbaba nâm karyede vâki‘ Savranbaba Zâviyesi’nin vazîfe-i mu‘ayyene [ile] zâviyedârlığına bâ-berât-ı âlî mutasarrıf olan Ebûbekir b. Mahmud fevt olup mahlûlünden zâviye-i mezkûre vazîfe-i mu‘ayyenesiyle kendülere tevcîh olunmasını müteveffâ-yı mezbûrun sulbî oğulları sahibe-i arzuhâl Ahmed Sabî ve Ali b. Ebûbekir dâ‘îleri işbu arzuhâlleriyle istid‘â-[yı] inâyet ederler, fi’l-hakīka zâviyedârlık-ı mezkûre vazîfe-i mersûmesiyle el-yevm bâ-berât-ı âlî mezbûr Ebûbekir b. Mahmud’un üzerinde olduğu derkenârdan müstebân ve mezbûr Ebûbekir’in fevti vâki‘ ve Ahmed Sabî ve Ali dâ‘îleri müteveffâ-yı mezbûrun sulbî sahîh oğulları oldukları kazâ-i mezbûr ahâlîsinden Der-aliyye’de müsâfireten sâkinler Topçuoğlu Mustafa b. Abdullah ve Bekiroğlu Halil b. Mehmed nâm kimesnelerin alâ-tarîkı’ş-şehâde haber vermeleriyle zâviye-i mezkûre müteveffâ-yı mezbûr Ebûbekir b. Mahmud’un mahlûlünden sulbî oğulları merkūmân Ahmed Sabî ve Ali dâ‘îlerine ale’l-iştirâk tevcîh ve yedlerine bir kıt‘a berat-ı şerîf-i âlîşân sadaka ve ihsân buyurulmak iktizâ eylediği huzûr-ı âlîlerine i‘lâm olundu. Fî 15 S sene [1]250