Anadolu Sadareti Mahkemesi 1 Numaralı Sicil (H. 1247-1250/ M. 1831-1834) cilt: 93, sayfa: 174 Hüküm no: 184 Orijinal metin no: [34a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kavak kazası Domaniç köyündeki Şeyh Ali Tekkesi şeyhliğinin Hafız Mehmed’in vefatıyla es-Seyyid Hüseyin b. Abdurrahman’a tevcihi Ma‘rûz, Sâdır olan fermân-ı âlîlerine imtisâlen işbu Ladik kazâsı nâibi Mehmed Şâkir Efendi’nin mühr-i mutâbık arzına ve hâmişinde mastûr derkenâra nazar olundukda kurb-ı civârında Kavak kazâsında Domaniç nâm karyede Şeyh Ali Tekyesi’nin ber-mûceb-i şart-ı vâkıf tekye-nişîni olan Hâfız Mehmed bilâ-veled fevt olup yeri hâlî ve hizmet-i lâzımesi mahlûl olduğundan bahisle erbâb-ı istihkākdan es-Seyyid Hüseyin b. Abdurrahman’a tevcîh olunmasını nâib-i mûmâ-ileyhin arz-ı mezkûr meâlinden müstefâd olan tekye-i mezbûrun tekye-nişînliği mezbûr Hâfız Mehmed’in bâ-berât-ı âlî üzerinde olduğu askerî rûznâmçesi derkenârından müstebân ve müteveffâ-yı mezbûrun bilâ-veled fevtiyle merkūm es-Seyyid Hüseyin’in erbâb-ı istihkākdan ve tekye-nişînlik hizmetini idâreye muktedir olduğu kazâ-i mezbûr ahâlîsinden Der-aliyye’de müsâfireten sâkinler erbâb-ı vukūfdan es-Seyyid Abdurrahim b. es-Seyyid Ahmed ve es-Seyyid Abdullah b. İsmail ve Seyyid Osman b. Ali ve Abdullah b. Mustafa nâm kimesneler alâ-tarîkı’ş-şehâde ihbârlarıyla mefhûm-ı arz-ı mezkûr[u] tasdîk etmeleriyle bu sûretde tekye-nişînlik-i mezkûre müteveffâ-yı mezkûrun bilâ-veled fevti mahlûlünden mezbûr es-Seyyid Hüseyin b. Abdurrahman dâ‘îlerine tevcihi ve yedine berat-ı şerîf-i âlîşân sadaka ve ihsân buyurulmak ricâsıyla iktizâ eylediği huzûr-ı âlîlerine i‘lâm olundu. Fî 13 S sene [1]250