Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 41 Hüküm no: 1 Orijinal metin no: [1b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bandırma Malikânesi yarım hissesine mutasarrıf Şerif Lütfullah’ın varislerinden Meczub Mehmed’in yetimlerinin çiftliklerde ve sair yerlerde olan haklarının korunması Ma‘rûz-ı dâ‘îdir ki, Sâdır olan emr-i âlîlerine imtisâlen arzuhâl hâmişinde mastûr derkenâra nazar ve tedkīk olundukda Bandırma mâlikânesinin nısf hissesine mutasarrıf olan Şerif Lütfullah bundan akdem fevt olup terekesi iki nefer sulbî oğulları zevcim meczûb Mehmed ile Salih İzzet nâm kimesnelere münhasıra olup mâlikâne-i mezkûre ile kasaba-i mezbûre civârında olan emlâk-ı sâiresi merkūmâna bâ-irâde-i seniyye in‘âm buyurmuş ise de zevcim mezbûr kullarının karındaşı İzzet kulları bi’l-cümle emvâl ve eşyâyı telef birle mâlikânenin rub‘ hissesi meczûbun olup senede altı bin guruş ve mülk îrâdı beş bin guruş ve Erdek kazâsında olan Balık öşrü ve Tekfur karyesinde olan çiftliği ve Sığırcı Çiftliği ve çiftlikât-ı mezkûreden mâ‘ada derûnunda olan emvâl-i sâiresi ve kasaba-i mezbûrede bir kıt‘a bezirhâne karındaşı kulları fuzûlî zabt ve hâl-i hayatında meczûb olduğundan hesâbını rü’yet ve ihkāk-ı hak etmeyerek zevcim mezbûr Mehmed kulları fevt olup terekesi firâşından hâsıl ve bu câriyenizden mütevellid sagīr oğlu Ahmed ve sagīre kızı Nefise ve Hanife’ye münhasıra ise de ammileri olan merkūm İzzet dahi emvâl-i mezkûreden eytâm-ı mezbûrenin hisselerini vermeyip mezbûr İzzet dahi fevt olup terekesi in‘âm-ı seniyye buyurularak zevcesiyle işbu eytâm kullarına münhasıra olmağla şimdiye kadar ihkāk-ı hak olunmadığından eytâm kullarına gadrı mûcib olup bu câriyeleri eytâmın vasîsi ve Bandırma Müftüsü Hacı Veli nâzırları ise de işbu zikr olunan emvâl ne mahâlde kaldığı tebeyyün etmediğinden yedimde olan fetvâ-yı şerîfe mûcebince müteveffâ-yı mezbûr İzzet Bey’in hesâbları mahâllinde şer‘le rü’yet ve zevcim müteveffâ meczûb Mehmed’in pederinden hissesi ne mahâlde kalmış ise zâhire ihrâcıyla müteveffâ-yı mezbûr karındaşı İzzet Bey’in terekesinden eytâmın hakkı ihkāk buyurulması bâbında kazâ-i mezkûr hâkimine hitâben bir kıt‘a emr-i âlî ısdârı ile mesrûr buyurulmak deyü sâhibe-i arzuhâl olan vasiyy-i mezbûr Emine Hatun’un işbu arzuhâli meâlinden müstebân ve müteveffâ-yı mezbûr Lütfullah nâm kimesnenin cânib-i mîrîden terekesinin zabtına dâir bir kayd bulunmadığı ve husûs-ı mezkûr için dahi Dîvân-ı hümâyûn tarafından emr-i âlî verildiğinin kaydı bulunmadığı derkenâr kuyûdu meâlinden nümâyân olmağla bu sûretde müteveffâ-yı mezbûr meczûb Mehmed’in sulbî oğlu Ahmed nâm sagīr ile sulbiye kızı Nefise ve Hanife nâm sagīrelerin vâlideleri ve vasîleri olan sâhibe-i arzuhâl Emine Hatun sıgār-ı mezbûrların babaları müteveffâ-yı mezbûrun babası olan müteveffâ Lütfullah nâm kimesneden mevrûs emvâl ve emlâkden hisse-i irsiyesi ve ba‘dehu vefât eden yine sıgār-ı mezbûrûnun ammileri İzzet Bey’in terekesinden sıgār-ı mezbûrûna müntakil hukūk-ı irsiyelerinin taleb ve iddi‘âsında olduğu meâl-i arzuhâl-i mezkûrdan nümâyân ise de müteveffâ-yı mezbûr İzzet Bey’in terekesine el-hâletü hâzihî vâzı‘u’l-yed olanlar kimler olduğu mefhûm-ı arzuhâl-i mezkûrdan ma‘lûm olmayıp ancak sıyâneten li’l-eytâm vasiyy-i mezbûr olan Emine Hatun vech-i meşrûh üzere istid‘âsı vâki‘ olduğu sûretde sıgār-ı eytâm-ı mezbûrûnun babaları müteveffâ-yı mezbûr meczûb Mehmed ile ammileri mezbûr müteveffâ İzzet Bey’in terekesine vâzı‘u’l-yed olanlardan taleb ve iddi‘âsı vukū‘unda tarafeyn bi’l-muvâcehe ber-nehc-i şer‘î de‘âvî-i vâkı‘alarını istimâ‘ ve rü’yet eyleyip sıgār-ı eytâm-ı mezbûrûnun hukūk-ı şer‘iyyeleri şer‘an tahakkuk eyledikden sonra alıverilmesiyle ihkāk-ı hakka dikkat olunmasını âmir hâlâ Bandırma kazâsı nâibine bir kıt‘a emr-i âlî ısdârı muvâfık-ı re’y-i âlîleri buyurulur ise ol bâbda ve her hâlde emr ü irâde hazret-i men-lehü’l-emrindir. Fî 17 C sene [1]251