Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 42 Hüküm no: 2 Orijinal metin no: [1b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Burdur Mahkemesi Kâtipliğine tayin olunmuş olan Hüseyin’in azledilerek yerine eski kâtip Müftüzade Ahmed Efendi’nin tayin edilmesi Ma‘rûz-ı dâ‘îleridir ki, Sâdır olan emr-i âlîlerine imtisâlen işbu arzuhâl ve hâmişinde mastûr derkenâra nazar olundukda bâ-berât-ı âlîşân Burdur kazâsı mahkemesinde kitâbet cihetine mutasarrıf olup on dokuz seneden mütecâviz edâ-i hizmetde kusûrum yoğiken bundan akdem Hüseyin Efendi nâm kimesne ba‘zı mahallere istinâdı hasebiyle bi-gayr-ı hakkın yedimde olan cihet-i mezbûr berâtını cebren ahz ve bir takrîb üzerine berât etdirip gadr etmekle sâhib-i evvel olduğumdan berât kaydı ba‘de’l-ihrâç bu kullarına tevcîh ve berât-ı âlîşân inâyet buyurulmak bâbında sâhib-i arzuhâl Ahmed kulları istid‘â-yı inâyet eylediği meâl-i arzuhâl-i mezkûrdan müstefât ve Burdur kazâsı mahkemesinde kâtib olan mezbûr Müftüzâde Ahmed’in ferâğından bin iki yüz kırk altı Şa‘bânı’nın sekizinci günü kazâ-i mezbûr nâibi Kādızâde Mustafa Raşid Efendi arzıyla kazâ-i mezbûr ahâlîsinden Hüseyin Efendi’ye tevcîh ve berât olunduğu kaydı derkenârından müstebân oldukdan sonra sâhib-i arzuhâl mezbûr Ahmed bin iki yüz kırk altı senesinde kazâ-i mezbûrda bulunan Ârif Ağa merhûm Ahmed’i tazyîk ve cebren cihet-i mezkûr berâtını yedinden alıp kazâ-i mezbûrda nâib bulunan Kādızâde Mustafa Raşid Efendi’ye hilâf-ı vâki‘ olarak arz etdirmiş olduğunu kazâ-i mezbûr ahâlîsinden Dersa‘âdet’de müsâfiren sâkinûn Hasan b. Ali ve İsmail b. Selim ve Ahmed b. Mustafa nâm kimesnelerin alâ-tarîkı’ş-şehâde ihbârlarından nümâyân olmağla bu sûretde kâtib-i mezkûrun cihetine bâ-berât-ı âlîşân mutasarrıf olan merkūm Hüseyin’in ref‘inden sâhib-i evveli olan merkūm Ahmed’e ber-mûceb-i ihbâr tevcîh ve yedine berât-ı şerîf-i âlîşân sadaka ve ihsân buyurulmak muvâfık-ı re’y-i âlîleri buyurulur ise ol bâbda ve her hâlde emr ü irâde hazret-i men-lehü’l-emrindir. Fî 19 C sene [12]51.