Balat Mahkemesi 2 Numaralı Sicil (H. 970 - 971 / M. 1563) cilt: 11, sayfa: 128 Hüküm no: 147 Orijinal metin no: [27b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Toma Pinos’un, Ayakapısı’ndaki mülkünü Mehmed b. Abdullah’a sattığı ve çıkan ihtilafta ibrâ ettiği Toma v. Pinos en-Nasrânî meclis-i şer‘de Mehmed b. Abdullah nâm kadırga reisi mahzarında ikrâr ve takrîr-i merâm edip mahrûse-i İstanbul hâricinde Aya kapısı kurbunda bir tarafında Muhyiddin haccâr mülkü ile ve bir tarafı İstemad v. Reis ve bir tarafı sâhil-i bahr ile ve bir tarafı tarîk-i âm ile mahdûd olanı mezbûr reise ile elli bin akçeye bey‘ ettiğimden sonra sekiz bin akçe bâkī kaldı deyip ve beni ölün[ceye] beslemek şartıyla sattım deyû da‘vâ etmekle mezbûr reis ile münâza‘ât-ı kesîre ve muhâsamât-ı şedîde etmiş idim hâlâ mezbûr reisden iki bin yüz akçe alıp kabz eyledim ve mezbûr reisin zimmetini cemî‘ da‘vâdan ve eymân ve muhâsamâtdan umûmen, husûsen zikr olunan evin semenine müte‘allik olan da‘vâdan ibrâ-i âm ile ibrâ ve iskāt eyledim dedikde mukırr-ı mezbûru mezkûr Mehmed bi’l-muvâcehe tasdîk edicek mâ vaka‘a bi’t-taleb kayd olundu. Tahrîren fî gurreti Receb sene 970. Şuhûdü’l-hâl: Mehmed Çelebi Çilingirzâde, Sinan Çelebi Makramalızâde, Mehmed Çelebi Eymirşâh karındaşı, Karagöz Bey b. Abdullah an çavuşân mirmîrân, Mahmud Çelebi b. Mustafa el-kāid, Abdi b. Ahmed, İbrahim b. Mustafa, Ahmed b. Mustafa