Balat Mahkemesi 2 Numaralı Sicil (H. 970 - 971 / M. 1563) cilt: 11, sayfa: 131 Hüküm no: 153 Orijinal metin no: [28b-2, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Zeyni bt. Sinan adlı küçük kızın nafaka ihtiyacı için babasından intikal eden bağın satışı Müteveffâ Sinan b. Abdullah kıbelinden kızı Zeyni bt. Sinan nâm sagīreye vasiyy-i muhtâre nasb edildiği bimâ hüve tarîki’s-sübût şer‘an sâbit olan Hurşid bt. Abdullah, âti’z-zikr bağı, vesâyet-i mahkiyesi ile hâmil-i hâze’l-kitâb Hatîb Mevlânâ Hasan b. Ahmed’e bey‘-i bâtt-ı sahîh ile bey‘ ettiğini ikrâr etti. Müşterî-i mezbûr da, müteveffâ-yı mezbûr Sinan’ın muhallefâtından olup mahmiye-i Kostantıniyye sur kapılarından Topkapısı hâricinde vâki‘ Başçı kuyusu kurbunda kâin üç buçuk tarla büyüklüğündeki, bir tarafdan Ahmed Bey b. Abdullah bağı, diğer tarafdan Eymirşâh b. Abdullah bağı, öteki tarafdan Hasan Bey b. Abdullah bağı ve diğer tarafdan da tarîk-i âm ile mahdûd ve mukāta‘a-i arzı senelik on altı akçe olan mülk bağı cümle hudûdu ve kâffe-i hukūku ile râyicü’l-vakt otuz beş tâmmü’l-vezn ve sahîhü’l-ayar altın semen-i mu‘ayyen-i makbûzla vasiyy-i mezbûrdan iştirâ etti. Müşterî-i merkūm vâki‘ ikrârı bi’l-muvâcehe tasdîk etti. İşbu mubâya‘a, sagīre-i mezbûrenin nafaka zarûretinin ve müteveffâ-yı mezbûrun paraya tahvîl edilecek başka bir mâl bırakmadığının sâbit olmasından ve mebî‘-i mezbûrun müzâyedeye arz edilip semen-i mezbûrun mikdâr-ı müşârun ileyh ile müşterî-i merkūm üzerinde karâr kılmasından sonra vâki‘ oldu. Cerâ zâlike ve hurrire fî evâili Şa‘bân sene 970. Şuhûdü’l-hâl: İskender b. Yunus es-sipâhi, Sinan Bey b. Abdullah es-sipâhi, İshak b. Abdullah ve Hacı Hamza b. Tur, İsmail b. Ali, Ahmed b. Mustafa