Balat Mahkemesi 2 Numaralı Sicil (H. 970 - 971 / M. 1563) cilt: 11, sayfa: 146 Hüküm no: 180 Orijinal metin no: [34a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İki sipahinin birbirlerinin sınırına giren timar topraklarından topladıkları vergiyle ilgili anlaşmaları Hâlâ Şumnu kazâsına tâbi‘ Yörük Kasım nâm karyeye ber vech-i timar mutasarrıf olan Mustafa b. Savcı nâm sipâhi karye-i mezbûrenin kurbunda vâki‘ olan Yeniköprü nâm timara bi’l-fi‘il mutasarrıf olan Osman Bey b. Yunus nâm za‘îm mahzarında ikrâr ve takrîr-i merâm edip zikr olunan karyelerin mu‘ayyen sınırları olmayıp yerleri mahlût olmağla her kişi kendi ra‘iyyeti zirâ‘at eylediği yerleri hâsılasını ta‘şîr etmek mukannen iken mezbûr Osman Bey işbu sene seb‘a ve tis‘a mie ve sene semâne ve sittîn ve tis‘a miede benim re‘âyam kendi baltaları ile açıp ihyâ eyleyip nice yıldan berî tasarruf edip öşrünü bana ve benden evvel olan sipâhilere veregeldikleri yerlerin öşründe bana âid olan hukūk kendi ikrârı mûcebince on üç kile buğday ve bir kile arpa ve bir kile darı alıp kabz etmiş idi hâlâ zikr olunan on üç kile buğday ve bir kile darı ve bir kile arpa bahâsından mezbûr Osman Bey yedinde üç yüz otuz altı akçeyi alıp kabz eyledim dedikde mukırr-ı mezbûru mezkûr Osman Bey bi’l-muvâcehe tasdîk eylediği mâ vaka‘a bi’t-taleb kayd olundu. Tahrîren fî 9 Şa‘bân sene 970. Şuhûdü’l-hâl: Ahmed b. Mustafa, İbrahim b. Mustafa, Cafer b. Abdullah, Ahmed b. Süleyman ve gayruhüm mine’l-hâzırîn