Balat Mahkemesi 2 Numaralı Sicil (H. 970 - 971 / M. 1563) cilt: 11, sayfa: 149 Hüküm no: 186 Orijinal metin no: [35a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Gül Camii mahallesinde yer alan evin satıldığı ve kalan paranın da alındığına dâir Bölükbaşı Mahmud oğlu Mustafa nâm bâliğ-i emred, bölükbaşı Yusuf b. İskender mahzarında ikrâr ve takrîr-i merâm edip bundan akdem mezbûr bölükbaşı kıbel-i şer‘den vasî olup babamdan bana irs-i şer‘le intikāl eden muhallefâtdan Gül câmi‘i mahallesinde vâki‘ olup bir tarafından Rüstem Paşa’nın vakıf fırını ile ve bir tarafından Simkeş Muslihiddin mülkü ve bir tarafı İpekçi Hüseyin b. Abdullah mülkü ve iki tarafı tarîk-i âm ile mahdûd olup dört bin akçe bahâ tutan evimi ve on bin yüz elli akçe ki cem‘an on dört bin yüz elli akçe olur kabz etmiş idi hâlâ mezbûr vasî yedinden zikr olunan evi ve nakdi bî-kusûr alıp kabz eyledim mezbûr vasînin yedinde bir hakkım bâkī kalmadı dedikde mukırr-ı mezbûru mezkûr vasî bi’l-muvâcehe tasdîk edicek mâ vaka‘a bi’t-taleb kayd olundu. Tahrîren fî 5 Şa‘bân sene 970. Şuhûdü’l-hâl: Mahmud Subaşı b. Abdullah, Mahmud b. Abdullah er-râcil, Şaban b. Abdullah er-râcil, Hamza b. Abdullah er-râcil, Alagöz b. Abdullah er-râcil, Sefer b. Abdullah er-râcil, Mustafa b. Abdullah, Pervâne b. Abdullah, Yedekçi Sinan Bey b. Abdullah, Mahmud b. Abdullah