Balat Mahkemesi 2 Numaralı Sicil (H. 970 - 971 / M. 1563) cilt: 11, sayfa: 174 Hüküm no: 233 Orijinal metin no: [43b-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Peçin kasabasında Nasûh Bey tarafından yaptırılan okuldaki hoca ve halifelerin 970 ve 971 yılları ücretleri Merhûm Nasûh Bey’in kasaba-i Peçin’de vâki‘ olan mektebinin mu‘allimi olan Ahmed b. Muslihiddin ve halîfesi olan Cafer b. Hasan ve cüzhânlarından Muhyiddin Halîfe ve Abdullah Halîfe ve diğer Muhyiddin Halîfe ve Gazanfer b. Altun ve Hasan Halîfe ve Yahya Halîfe ve Nasrullah Halîfe nâm kimesneler kıbelinden bimâ-hüve tarîki’s-subût şer‘an vekâleti sâbit olan Hacı Lütfullah Çelebi b. el-Hâc Abdülcebbar nâm kimesne merhûm-ı mezbûrun evkāfına bi’l-fi’l mütevellî olan Bedreddin b. İlyas nâm kimesne mahzarında ikrâr ve takrîr-i merâm edip mezbûrûn mürtezikanın sene seb‘în ve tis‘a mie ve sene ihdâ ve seb‘în ve tis‘a miede olan mevâcibleri için mezbûr mütevellî yedinden vekâlet-i mahkiyem ile on bin seksen akçe alıp kabz eyledim mezbûrûn mürtezikanın seneteyn-i mezbûreteyn mevâcibine mezbûr mütevellî yedinden bir habbeleri bâkī kalmadı dedikde mukırr-ı mezbûru mezbûr mütevellî bi’l-muvâcehe tasdîk edicek mâ-vaka‘a bi’t-taleb kayd olundu. Tahrîren fî evâhiri şehri Ramazan sene 970. Şuhûdü’l-hâl: İbrahim Halîfe b. Ramazan Mehmed b. Abdullah Ahmed b. Abdullah ve gayruhüm