Balat Mahkemesi 2 Numaralı Sicil (H. 970 - 971 / M. 1563) cilt: 11, sayfa: 190 Hüküm no: 265 Orijinal metin no: [49b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Satılan kılıç bedelinin istenmesi ve sulh olunması Bundan akdem fevt olan Yakub b. Abdullah’ın zevcesi ve vârisesi olan Ruşen bt. Abdullah nâm Hâtun’u, Süleyman b. Mehmed nâm kimesne meclis-i şer‘a ihzâr ve mahzarında takrîr-i da‘vâ edip mezbûr mûrisin Yakub’a hâl-i hayâtında dört bin üç yüz kırk akçeye bir gümüşlü Dımeşkî kılıç verdim semenin vermeden fevt olup zimmetinde kaldı el-ân lâzimü’l-edâ deyndir taleb ederim dedikde gıbbe’s-suâl ba‘de’l-inkâr müdde‘î-i mezbûrdan beyyine taleb olundukda udûlden Hacı Ferhad b. Abdullah ve Hacı Sinan b. Abdullah ve Üstâd Ömer b. Veli nâm kimesneler mezbûr Süleyman mezbûr Yakub’a semen-i mezbûr ile evsâf-ı mezbûre ile mevsûf bir kılıç bey‘ eyledi deyû gıbbe’l-istişhâdi’ş-şer‘î münkire-i mezbûre mahzarında edâ-yı şehâdet-i şer‘iyye ettiklerinde şehâdetleri ba‘de’t-ta‘dîli’ş-şer‘î ve’t-tezkiyeti’ş-şer‘iyye hayyiz-i kabûlde vâki‘ olup mezbûr müdde‘î zikr olunan meblağın küllîsini veya ba‘zısını merkūm Süleyman’dan almayıp veya bağışlamayıp veya kimesneye havâle etmediğine yemîn verildikden sonra meblağ-ı mezbûr merkūm Yakub’un terekesinden edâ olunmağa hükm olundu. Ba‘dehû mezbûr müdde‘î meclis-i şer‘a hâzır olup ikrâr ve itirâf eyleyip mezbûre Ruşen’in yedinden ibrâ-i âti’z-zikr mukābelesinde bin yüz akçe alıp mezbûre Ruşen’in zimmetini cemî‘ da‘vâdan ve eymân ve muhâsamâtdan umûmen husûsen zikr olunan kılıç bahâsına müte‘allik da‘vâdan ibrâ-i âmla ibrâ ve iskāt eyledim dedikde mukırr-ı mezbûru mezbûre Ruşen bi’l-muvâcehe tasdîk etti. Hurrire fî evâili Şevvâl sene 970. Şuhûdü’l-hâl: Ahmed b. Süleyman, Cafer b. Abdullah, el-Hâc Abdullah b. Abdullah, İbrahim b. Mustafa, Ahmed b. Mustafa