Balat Mahkemesi 2 Numaralı Sicil (H. 970 - 971 / M. 1563) cilt: 11, sayfa: 242 Hüküm no: 370 Orijinal metin no: [66b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Tüccar İsa b. İbrahim’in vârislerinin adı geçenin muhallefâtından beytülmâlde olan elli bin akçeyi almaları gerektiği Bundan akdem Şahnisâ bt. Abdullah nâm hâtun ve el-Hâc Halil b. Musa nâm kimesneler dîvân-ı âlî lâ zâle mühebbetan li’l-feyzi’l-bârîye hâzırân olup emâcid-i mükerremeyn-i deftereyn katlarında ve hâlâ mahrûse-i İstanbul’da beytülmâl emîni olan Mustafa Çelebi b. Behmen ve kâtibi Derviş Çelebi b. Lütfi mahzarında mezbûre Şahnisâ, mahrûse-i Bursa’ya giderken garîkan fevt olup muhallefâtından dört haml bürüncüğü sene 970 Şevvâli’nde hâssa beytülmâle zabt olunan İsa b. İbrahim nâm kimesnenin sulbiye kızı Ayşe’nin kıbel-i şer‘den mansûb vasîsiyim ve mezbûr Hacı Halil, merkūm müteveffânın li eb ve üm karındaşı olan Musa’nın sulbî oğluyum deyû hâlâ Yarhisar kadısı olan Mevlânâ Hasan b. Yusuf’dan husûs-ı kaziyyeyi müştemil mezbûre Ayşe ve Halil’den gayrı vârisi yoktur ve mazmûnu bimâ hüve tarîki’s-subût şer‘an sâbit nakl-i şehâdet ibrâz edip da‘vâ-yı verâset ettiğimizde İbrahim b. Kurd ve Mehmed b. Hüseyin ve Ali b. Hüseyin ve el-Hâc Ahmed b. Mustafa nâm kimesneler şehâdetleriyle verâsetimiz sâbit olup zikr olunan dört haml bürüncüğü kabz edip ve elimize hüccet-i şer‘iyye almış idik hâlâ müteveffâ-yı mezbûrun mahrûse-i mezbûrede olan muhallefâtından elli bin akçesi dahi mahrûse-i mezbûre beytülmâl emîni olan Refî‘uddin yedinden sene-i mezbûre Zilka‘desi’nin beşinde Hızâne-i âmireye teslîm olunmuşdur, şimdiki hâlde zikr olunan elli bin akçeyi dahi taleb ederiz dediklerinde hüccet-i şer‘iyye-i sâbıkaları mûcibi ile meblağ-ı mezbûr mezkûrlara hükm olundu. Tahrîren fî evâsıtı Zilhicce sene 970. Şuhûdü’l-hâl: ( )