Balat Mahkemesi 2 Numaralı Sicil (H. 970 - 971 / M. 1563) cilt: 11, sayfa: 247 Hüküm no: 379 Orijinal metin no: [68a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Merhûm Ahmed Paşa Evkâfı’ndan ödünç alan Mustafa Kethüdâ b. Hüseyin’in borcuna karşılık mücevherlerini rehin bırakması Mustafa Kethüdâ b. Hüseyin nâm kimesne meclis-i şer‘-i şerîfde bundan akdem Cezâyir beylerbeyisi iken fevt olan merhûm Ahmed Paşa’nın evkāfına bi’l-fi‘il mütevellî olan merhûm-ı mezbûrun karındaşı fahrü’l-akrân Hasan Ağa b. Mehmed mahzarında ikrâr ve takrîr-i merâm edip evkāf-ı mezbûre malından yedi filori karzdan ve yetmiş filori çuka bahâsından zimmetimde vardır ve zikr olunan deyne bir kırmızı kadife üzerine sekiz altın pullu her biri murassa‘ la‘l ve pîrûze ve yâkut ile ve bir murassa‘ hançer altın kınlı ve altın saplı deyn-i mezbûr için mükemmel rehn-i makbûzdur ve zikr olunan çuka bahâ müecceldir târih-i kitâb gününden bir yıl tamâmına varıncaya dek dedikde mukırr-ı mezbûru mezkûr mütevellî bi’l-muvâcehe tasdîk ettikden sonra zikr olunan rehinlerin zararına ve mâl-ı mezbûrun cemî‘sine Sarkis b. Dursun el-Ermenî et-tâcir emriyle kefîl olup mâ-vaka‘a bi’t-taleb kayd olundu. Tahrîren fî 19 evâsıtı Zilhicce sene 970. Şuhûdü’l-hâl: Abdi Çelebi b. Ali es-sahhâf, Mustafa Çelebi es-sahhâf, Ahmed b. Mehmed, Ahmed b. Ali, Derviş Mehmed Çelebi b. İskender el-mütevellî