Balat Mahkemesi 2 Numaralı Sicil (H. 970 - 971 / M. 1563) cilt: 11, sayfa: 259 Hüküm no: 407 Orijinal metin no: [72a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan b. Abdullah’ın evini Ferhad b. Abdullah’a satması, tarla ve çayırın tasarruf hakkını devretmesi Tepedelen kazâsında Bavala nâm karye ahâlîsinden Hasan b. Abdullah nâm kimesne karye-i mezbûrede mütemekkin olan Ferhad b. Abdullah nâm kimesne mahzarında ikrâr ve takrîr-i merâm edip karye-i mezbûrede vâki‘ olup bir cânibden Şirmerd b. Hasan ve bir cânibden Mehmed b. Abdullah ve bir tarafdan Petko b. Koniko nâm nasrânî mülkü ile ve bir tarafdan tarîk-i âm ile mahdûd olup bir kıt‘a bağı ve berber evini ve eşcâr-ı müsmireyi müştemil olan evini cemî‘ tevâbi‘i ve levâhıkı ile ve âmme-i menâfi‘ ve mürâfıkı ile altı yüz akçeye bey‘ eyledim ve semen-i mezbûru merkūm müşterî yedinden bî-kusûr alıp kabz eyledim ve bundan mâ‘adâ karye-i mezbûre sınırında bana intimâ ile ma‘rûf olmağın her biri tahdîdden ganî olan altı kıt‘a zirâ‘ata sâlih tarlaların ve bir kıt‘a çayırın hakk-ı tasarruflarını dahi mezbûr Ferhad’a tefvîz eyledim min ba‘d keyfe mâ-yeşâ mutasarrıf olup kimesne mâni‘ ve müzâhim olmaya dedikde mukırr-ı mezbûru merkūm Ferhad bi’l-muvâcehe tasdîk edicek mâ-vaka‘a bi’t-taleb kayd olundu. Fî evâili Muharrem sene 971. Şuhûdü’l-hâl: Bâli Bey b. Abdullah, Kenan Bey b. Abdullah, Ahmed Subaşı b. Şeyh Sinan, Muslihiddin el-mu‘allim ve gayruhüm