Balat Mahkemesi 2 Numaralı Sicil (H. 970 - 971 / M. 1563) cilt: 11, sayfa: 260 Hüküm no: 408 Orijinal metin no: [72a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali b. İlyas’ın iki çiftliğini Ali Paşa’ya satması, çayır ve tarlanın tasarruf hakkını devretmesi Oldur ki, Ali b. İlyas nâm kimesne meclis-i şer‘-i şerîf ve mahfil-i dîn-i münîfde düstûr-ı ekrem müşîr-i efham nizâm-ı âlem müdebbir-i cumhûr-ı ümem râfi‘-i a‘lâmi’l-adl ve’l-insâf dâfi‘-i zulâmi’z-zulm ve’l-i‘tisâf el-mahfûf bi sunûf-i avâtıfı’l-meliki’l-mennân hazret-i Ali Paşa b. Hüseyin Bey -dâme izzuhû ve ikbâluhû- kıbel-i şerîflerinde şirâya ve def‘-i semene Mehmed Bey b. Yahya ve Yusuf b. İskender nâm kimesneler şehâdetleri ile vekâleti sâbit olan Yusuf b. Bâli nâm kimesne mahzarında ikrâr ve takrîr-i merâm edip Niğbolu kazâsı tevâbi‘inden Hulevnik nâm karyede vâki‘ olup biri birine muttasıl iki çatma evi ve bir fırını ve altı yanlarında bir büyük çatma ahırı ve altı yedi katar deve alır bir ahırı dahi ve evler önünde bir pınarı ve bir anbarı üstünde bir odayı ve iki koyun sâyesini ve bir öküz damını ve bir saman damını ve anbarında İstanbul keyli ile beş yüz keyl buğdayı ve beş yüz keyl alefi ve hurreye tezevvüc etmiş Efrenciyyü’l-asl Cafer nâm bir kulu ve beş aded sabanı ve iki arabayı ve iki büyük süt bakracını müştemil olup Kasab Hızır b. Yunus Çiftliği demekle ma‘rûf olmağla tahdîd ve ta‘yînden ganî olan çiftliği cemî‘ tevâbi‘ ve levâhıkı ile ve iki yüz re’s sağmal koyunu ve yüz elli re’s kuzusu ile ve beş re’s ineği ile ve beş çift öküzü ile ve karye-i mezbûre sınırında vâki‘ olup sâhibine intimâ ile ma‘rûf ve meşhûr olmağın tahdîdden ganî olan iki kıt‘a bağları ile ve yine mezbûrede vâki‘ olup mezbûr çiftliğe muttasıl [72b] olup iki çatma evi ortasında suffeyi ve sundurmayı müştemil olup Kilili Hacı Çiftliği demekle ma‘rûf olup sâhibine intimâ’la ma‘rûf ve meşhûr olmağın tahdîdden ganî olan çiftliği cemî‘ tevâbi‘ ve levâhıkı ile mezbûr Yusuf’a otuz bin râyicü’l-vakt akçeye bey‘ eyledim ol dahi müvekkil-i müşârun ileyhi için kabûl ve iştirâ eyledikden sonra meblağ-ı mezbûru merkūm vekîl yedinden bî-kusûr alıp kabz eyledim ve bundan mâ‘adâ sâhibine intimâ ile meşhûr olmağla tahdîdden ganî olup evvelki çiftliğin tevâbi‘inden olan bin iki yüz araba otu hâsıl olur çayırın yüz elli müdlükden ziyâde tarlaların ve örüsünün hakk-ı tasarrufunu ve ikinci çiftliğin tevâbi‘inden altmış araba ot hâsıl olur çayırın ve seksen müdlük yerden ziyâde tarlaların hakk-ı tasarruflarını dahi vekîl-i mezbûra tefvîz eyledim ol dahi müvekkil-i müşârun ileyhi için kabûl eyledi dedikde mukırr-ı mezbûru cemî‘ ikrârında mezbûr Yusuf bi’l-muvâcehe tasdîk edicek mâ-vaka‘a bi’t-taleb kayd olundu. Fî 8 Muharrem sene 971. Şuhûdü’l-hâl: Ahmed b. Süleyman, Mehmed b. Süleyman, Nasûh Bey b. Abdullah ve gayruhüm