Balat Mahkemesi 2 Numaralı Sicil (H. 970 - 971 / M. 1563) cilt: 11, sayfa: 268 Hüküm no: 423 Orijinal metin no: [74b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Cezayir timar defterdârı Keyvan Bey’in Edirne Hacı Köyü’ndeki çiftliğini Rumeli defterdârı Mehmed Çelebi Efendi’ye sattığı, tarla ve çayırların tasarruf hakkını verdiği Oldur ki, Hâlâ vilâyet-i Cezâyir’de timar defterdârı olan fahrü’l-emâsil ve’l-akrân zahrü’l-ekâbir ve’l-a‘yân Keyvan Bey b. Abdülmennân nâm kimesne tarafından âti’z-zikr olan bey‘a ve kabz-ı semene Veli Çavuş b. Abdullah ve Sinan Reis b. Abdullah ve Bayezid b. Abdullah nâm kimesneler şehâdetleri ile vekâleti sâbit olan umdetü’l-emâsil ve’l-akrân vilâyet-i mezbûrede mîr-i alem olan Hüseyin Bey b. Abdurrahman nâm kimesne şerefü’l-emâcid ve’l-a‘yân mecma‘ü’l-mekârim ve’l-ihsân melce’ü erbâbü’l-izzeti’l-aliyye zübdetü ashâbi’s-sa‘âdeti’l-behiyye hâvi’l-me‘âlî ve’l-me’âsir mecma‘ü’l-mekârim ve’l-mefâhir el-mahsûs bi inâyeti’l-meliki’l-müte‘âlî hâlâ vilâyet-i Rumeli Defterdârı Mehmed Çelebi Efendi b. el-merhûm Ali Bey kıbelinden âti’z-zikr olan şirâya ve def‘-i semene Ahmed Çelebi b. Mehmed ve Ahmed Bey b. Mahmud nâm kimesneler şehâdetleri ile vekâleti sâbit olan Mahmud Bey b. İskender mahzarında ikrâr ve takrîr-i merâm edip, müvekkil-i merkūmumun hâlâ taht-ı tasarrufunda olan emlâkinden mahmiye-i Edirne tevâbi‘inden Hacı Köyü demekle meşhûr olan karyede sâhibine intimâ ile tahdîdden ganî ve tarîfden müstağnî olmağın ma‘rûf ve meşhûr olup muhavvata-i dâhiliyesinde taş duvarlı ve kiremit örtülü iki ka[r]şılı evleri ve sundurmayı ve iki hizmetkârlar için binâ olunmuş evleri ve bir fırını ve bir kileri ve su kuyusunu ve tavanı kiremit örtülü ve üstü çardaklı beş göz anbarı ve muhavvata-i hâriciyede saz örtülü iki karşılı evleri ve suffe ve altı katar deve alır bir kiremit örtülü ahır ve yanında bir odayı ve ahır-ı mezbûr kurbunda bir at değirmenini ve değirmenin levâzımını ve sundurmayı ve bir üstü kiremit örtülü çardaklı anbarı ve bir saz örtülü damı ve bir büyük samanlığı ve bir fırını ve bir su kuyusunu ve tavuk kümesini ve buzağı duracak yeri müştemil olan çiftliği mezbûr Mahmud Bey’e on bin fıddî râyicü’l-vakt akçeye bey‘-i sahîh-i şer‘î ile bey‘ eyledim ol dahi müvekkil-i mûmâ-ileyhi için kabûl ve iştirâ ettikden sonra mezbûr vekîlin yedinden semen-i mezbûru bî-kusûr alıp kabz eyledim ve karye-i mezbûrede hâlâ müvekkil-i mezbûrun taht-ı tasarrufunda olup sâhibine intimâ ile ma‘lûm ve meşhûr olmağın tahdîdden ganî olan çayırlarının ve zirâ‘at ve hırâset olunan yerlerinin hakk-ı tasarruflarını dahi mezbûr vekîle tefvîz eyledim ol dahi müvekkil-i müşârun-ileyhi için kabûl eyledi dedikde mukırr-ı mezbûru mezkûr Mahmud Bey bi’l-muvâcehe tasdîk edicek mâ-vaka‘a bi’t-taleb kayd olundu. Fî evâhiri Muharrem sene 971. Şuhûdü’l-hâl: Ali b. Hüseyin, Derviş Mehmed b. İskender el-mütevellî alâ evkāfi’l-merkūm Mustafa Paşa, Cafer b. Abdullah