Balat Mahkemesi 2 Numaralı Sicil (H. 970 - 971 / M. 1563) cilt: 11, sayfa: 269 Hüküm no: 425 Orijinal metin no: [75a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Çelebi b. Mehmed’in verâsetinin intikal ettiği iki oğlunun da ölümüyle muhallefâtlarının ninelerine geçmesi Şah Hûbân Hâtun bt. Sadi Bey nâm hâtun kıbelinden husûs-ı âtîye bimâ hüve tarîki’s-sübût şer‘an vekâlet-i mutlakası sâbit olan mezbûr Şah Hûbân Hâtun’un oğlu Mehmed Bey b. Ali nâm kimesne meclis-i şer‘-i şerîf ve mahfil-i dîn-i münîfde Zâhide bt. Mehmed Bey nâm hâtun kıbelinden bimâ hüve tarîki’s-sübût şer‘an vekâleti sâbit olan fahrü’l-akrân hâlâ silâhdarlar kethüdâsı pîrî olan Sinan Kethüdâ b. Üveys nâm kimesne mahzarında ikrâr ve takrîr-i merâm edip bundan akdem Şerîfe-zâde demekle ma‘rûf olan merhûm-ı mebrûr Mehmed Çelebi b. Mehmed fevt oldukda verâseti Koca Bey ve Pîr Ahmed Çelebi nâm sagīr oğullarına münhasıra oldukda merkūm Koca Bey’e intikāl eyleyen hisseyi mezbûre Zâhide Hâtun’un zevci Fazlı Bey b. Mevlânâ Hasan kıbel-i şer‘den vasî olmağla kabz ettikden sonra Koca Bey dahi fevt olup cemî‘ muhallefâtı karındaşı mezbûr Pîr Ahmed Çelebi’ye intikāl ettikden sonra mezbûr Fazlı Bey dahi fevt olup mezbûr Koca Bey’in malından yedinde olan ve sâir muhallefâtını mezbûre Zâhide zabt eyledikden sonra mezbûr Pîr Ahmed Çelebi dahi fevt olup cemî‘ muhallefâtı babasının anası olan Hesnâ nâm hâtun ile anasının anası mezbûre Şah Hûbân Hâtun’a münhasıra olup mezbûre Şah Hûbân Hâtun’a merkūm Pîr Ahmed Çelebi’den intikāl eyleyen meblağdan mezbûre Zâhide’nin yedinde bâkī kalan altı bin yedi yüz akçeyi sâbıkan merkūm Zâhide Hâtun’dan vekâlet-i mahkiyem ile taleb etmiş idim hâlâ zikr olunan meblağı seksen iki filoriye sulh eyledim ve bedel-i sulh olan meblağı mezbûr Sinan Kethüdâ’nın yedinden bî-kusûr mezbûre Zâhide’nin vekîli olan Sinan Kethüdâ ile alıp kabz eyledim ve müvekkile-i mezbûre Zâhide’nin zimmetini cemî‘ da‘vâdan ve eymân ve muhâsamâtdan umûmen, müteveffâ-yı mezbûrun terekesine müte‘allik olan da‘vâdan husûsen ibrâ-i âmla ibrâ ve iskāt eyledim dedikde mukırr-ı mezbûru mezkûr Sinan Ahmed bi’l-muvâcehe tasdîk ve ibrâsını kabûl edicek mâ-vaka‘a bi’t-taleb kayd olundu. Fî evâhiri Muharrem sene 971. Şuhûdü’l-hâl: Mehmed Çelebi b. Hasan, Sinan Çavuş b. Abdullah, Ömer Bey b. İlyas, Şaban Çelebi b. Osman, Mevlânâ Şemseddin Halîfe, el-Hâc Hüsrev b. Abdullah, Şâvur Bey b. Abdullah ez-za‘îm, el-Hâc Perviz b. Abdullah ve gayruhüm