Balat Mahkemesi 2 Numaralı Sicil (H. 970 - 971 / M. 1563) cilt: 11, sayfa: 295 Hüküm no: 478 Orijinal metin no: [83a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şah Mehmed Çelebi’nin Alibeyköy’de sahip olduğu mülklerini Mülayime Hatun’a satıp bedelini tahsil ettiği Oldur ki, Fahrü’l-ulemâ’i’l-izâm zahrü’l-fuzelâi’l-fihâm el-mahsûs bi inâyeti’l-meliki’l-müte‘âlî Mevlânâ Şah Mehmed Çelebi Efendi b. el-merhûm Hürrem Çelebi meclis-i şer‘-i şerîf ve mahfil-i dîn-i münîfde Çatal Ağa demekle ma‘rûf Sinan Bey b. Abdullah nâm dilsizin zevcesi olan Mülayime bt. Abdullah nâm hâtun mahzarında ikrâr ve takrîr-i merâm edip havâss-ı Kostantıniyye tevâbi‘inden Alibey nâm karyede vâki‘ olup iki karşılı sıra evlerini ortalarında bir sofayı ve yanlarında iki sofaları altlarında serdâbil ve matbahı ve kileri ve fırını ve ıstablı ve anbarı ve bi’r-i mâî ve cüneyne ve hadîkayı müştemil olup bir tarafdan Mevlânâ Seyfi Çelebi b. Mahmud el-müderris ile ve cebel ile ve tarîk-i âm ve hâs ile mahdûd olan mülk menzil binâsını ve menzil-i mezbûr karşısında vâki‘ ve eşcâr-ı müsmire ve gayri müsmireyi müştemil olup bir tarafdan Yahya Kethüdâ b. Abdullah ve bir tarafdan Terzi Ahmed mülkü ile ve tarîk-i hâs ile mahdûd olan mülk bağımı ve dört su sığırı ve iki kara sığır öküzlerimi ve üç ineği ve dört buzağıyı ve on bir kazı ve yirmi tavuğu ve iki baltayı ve iki beli ve iki çapayı ve iki arabayı ve iki saban demirini ve iki harman düveni ve sâir âlât-ı zirâ‘at ve esbâb-ı hırâseti ve İstanbul müddü ile üç müd buğdayı keyl-i mezbûr ile ve elli keyl ekilmiş alefi ve on beş çit samanı ve yine karye-i mezbûrede iki beyt-i süfliyi ve kürümü ve muhavvata-yı sagīreyi ve hadîkayı ve ıstablı müştemil olan Hamza Subaşı mülkü ile ve tarîk-i âm ile ve Hüseyin b. Abdullah mülkü ile mahdûd olan menzilden zikr [olunan] iki evleri ve kürümü ve muhavvatayı ve bâb-ı mezbûrun nısf-ı mu‘ayyen ve ıstabl-ı mezbûrun nısf-ı mu‘ayyeni ve hadîka-yı mezbûreden sülüs hisse-i müfrezeyi karye-i mezbûre kurbunda üç tarafdan Hamza Subaşı kürümü ile ve Ali b. Mustafa kürümü ile mahdûd bir dönüm bağı cümle tevâbi‘ ve levâhıkları ile iki kara sığırı ile ve bir arabası ile ve bir saban demiri ve bir düveni ile sâlifetü’z-zikr Mülayime Hâtun’a otuz üç bin fıddî râyicü’l-vakt akçeye bey‘ eyledim ol dahi iştirâ ettikden sonra semen-i mezbûru müşteriye yedinden bî-kusûr alıp kabz eyledim ve bundan mâ‘adâ evvelâ zikr olunan menzil tevâbi‘inden olup tahmînen sekiz müdd-i mezbûr ile sekiz müd tohum ekilen yerleri ve menzil-i mezbûr tevâbi‘inden olan iki kıt‘a mezra‘anın dahi hakk-ı tasarruflarını mezbûre müşteriyyeye tefvîz eyledim ol dahi kabûl eyledi dedikde mukırr-ı mezbûru mezkûr müşteriye bi’l-muvâcehe tasdîk edicek mâ vaka‘a bi’t-taleb kayd olundu. Fî evâhiri Safer sene 971. Şuhûdü’l-hâl: El-Hâc İlyas b. Abdullah, Fahrü’l-müderrisîn Seyfi Çelebi Efendi b. el-merhûm Bedreddin, Fahrü’l-emsâl Yahya Kethüdâ b. Abdullah, el-Hâc Abdullah b. Abdullah, Haydar b. Abdullah, Mustafa b. Abdullah, el-Hâc Ömer b. ( ), Ahmed b. Abdullah, Hızır b. Abdullah ve gayruhüm