Balat Mahkemesi 2 Numaralı Sicil (H. 970 - 971 / M. 1563) cilt: 11, sayfa: 296 Hüküm no: 479 Orijinal metin no: [83b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasköy kazâsına bağlı Kayalı köyünde öldürülen tüccarın beytülmâlce el konulan eşyalarının ona ait olmadığının tespiti Oldur ki, Ahmed b. Yusuf nâm kimesne Dîvân-ı âlî lâ-zâle mehbitan li’l-feyzi’l-bârîye hâzır olup emâcid-i mükerremeyn-i deftereyn katlarında ve hâlâ beytülmâl-ı hâssa emîni olan Mustafa Çelebi b. Behmen ve Kâtibi Derviş Çelebi [b.] Lütfi mahzarlarında takrîr-i da‘vâ edip bundan akdem Hasköy kazâsına tâbi‘ Kayalı nâm karye kurbunda Dede b. Selim nâm tâciri kendi esirleri katl edip muhallefâtını kazâ-i mezbûrda beytülmâl emîni olan sağ bölük ulûfecilerinden Hüseyin nâm kimesne kabz ettikde maktûl-ı mezbûrun refîklerinden Memi b. Abdullah nâm kimesne elinde yirmi haml bakır ve otuz deste Üngürüs bıçağı ve bir deste ustura olup maktûl-ı mezbûrundur deyû mezbûr Hüseyin beytülmâl-i mezkûr içün zabt edip bey‘ eyledikden sonra cem‘an otuz bir bin üç yüz altı [akçe] ile otuz bir bin üç yüz otuz altı, târih-i kitâb senesi Saferi’nin on dördünde idiğinden yirmi beş bin dokuz yüz kırk iki akçe ve şehr-i mezbûrun on yedisinde dokuz yüz altmış dokuz akçesi ve yirmi ikisinde dört bin dört yüz yirmi beş akçesi emîn-i mezbûr elinden Hızâne-i âmireye teslîm olunmuşdur ve zikr olunan Memi b. Abdullah benim abd-i memlûkümdür ve mezbûr Memi’nin yedinden alınan metâ‘ benim mülk-i sahîh ve hakk-ı sarîhimdir kal‘a-i Belgrad’dan mahrûse-i İstanbul’a bey‘ olunmak içün irsâl eyledim deyû hâlâ Belgrad kadısı olan Mevlânâ Abdülkerim b. Abdullah’dan nakl-i şehâdet ibrâz edip ve bundan akdem husûs-ı mezbûrun görülmesi içün Kızılağaç Yenicesi kadısı olan Mevlânâ Muhyiddin’e Dergâh-ı sa‘âdetden hükm-ı şerîf-i cihân-mutâ‘ îrâd edip toprak kadısı ile mahall-i hâdiseye varıp ehl-i vukūfdan teftîş olundukda metâ‘-ı mezbûrda maktûl-i mesfûrun ta‘alluku olmayıp mezkûr Memi’nin elinden alındığı sâbit ve zâhir olduğunu müştemil Mevlânâ-yı merkūmdan dahi arz getirip da‘vâ eyledikde Hacı Yakub b. İmirze nâm tâcir ve el-Hâc Mehmed b. Karaman ve Ali b. Sırrı ve Hüdâverdi b. Ali şehâdetleri ile ve İlyas b. İbrahim ve Mustafa b. Üveys tezkiyeleri ile hükm olundu. Fî evâhiri Safer sene 971. Şuhûdü’l-hâl: ( )