Balat Mahkemesi 2 Numaralı Sicil (H. 970 - 971 / M. 1563) cilt: 11, sayfa: 297 Hüküm no: 481 Orijinal metin no: [84a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vârisi olmadığı gerekçesiyle el konulan Dimitri’nin muhallefâtının vârisine iadesi Kosta nâm zimmî Dergâh-ı âlîye hâzır olup emâcid-i mükerremeyn katlarında ve hâlâ hâssa beytülmâl emîni olan Mustafa Çelebi b. Behmen ve kâtibi Derviş Çelebi b. Nasûh mahzarlarında takrîr-i kelâm edip bundan Malkara kazâsına tâbi‘ Kalona nâm karyeden olup Cankirman kazâsında fevt olup metrûkâtından dört yüz kırk beş re’s koyununu Cankirman emîni olan Mehmed zabt eyleyip on üç bin üç yüz elli akçeye bey‘ eyleyip bahâsını sene dokuz [yüz] altmış altıda vâki‘ olan kılâ‘ mevâcibine sarf edip muhâsebesini Hızâne-i âmireye teslîm eylediği Dimitri v. Aval nâm zimmî benim li eb ve üm karındaşımdır mevlidimiz karye-i mezbûredir ve verâseti bana münhasıradır gayri vârisi yoktur deyû hâlâ kazâ-i mezbûr kadısı olan Mevlânâ Hüsam b. Abdurrahman’dan nakl-i şehâdet deyû ibrâz edip ve sâbıkan mezbûr Kosta, Cankirman kadısı olan Mustafa b. Mehmed taht-ı kazânda mürd olan Dimitri nâm zimmînin Hızâne-i âmireye irsâl olunan defterde adı Aval deyû kayd olunmuşdur teftîş edip göresin deyû hükm-i şerîf-i cihân-mutâ‘ıma îrâd edip emîn-i mezbûrdan ve sâir ehl-i vukūfdan suâl olundukda ismi mezbûr zimmînin ismi fi’l-hakîka Dimitri’dir lâkin bu yerlerde Aval deyû lakab konulmuşdur onunla meşhûr olup defterde ol isimle mukayyeddir demekle müştemil Mevlânâ-yı merkūmdan dahi arz ibrâz edip da‘vâ ettikde gıbbe’s-suâl ba‘de’l-inkâr müdde‘î-yi mezbûrdan beyyine taleb olundukda udûl-ı müslimînden Osman b. el-Hâc Ali ve el-Hâc Veli b. Mehmed ve Bakkal Mehmed b. İbrahim nâm kimesne hâzırûn olup gıbbe’l-istişhâdi’ş-şer‘î müdde‘î-yi mezbûrun takrîr-i meşrûhuna mutâbık edâ-yı şehâdet-i şer‘iyye ettiklerinde şehâdetleri ba‘de’t-ta‘dîl ve’t-tezkiye hayyiz-ı kabûlde vâki‘ olup mûcebiyle hükm olundu. Fi’l-mezbûr gurreti Rebî‘ilevvel sene [971]. Şuhûdü’l-hâl: Hasan b. Mustafa, Muslu b. İbrahim