Balat Mahkemesi 2 Numaralı Sicil (H. 970 - 971 / M. 1563) cilt: 11, sayfa: 325 Hüküm no: 524 Orijinal metin no: [94b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mevlânâ Mehmed’in karısına vekâleten teyzesinden kalan muhallefâtı ile ilgili açtığı davadan belli bir bedelle vazgeçtiği Mevlânâ Mehmed b. Ali Bey b. Muhyiddin nâm kimesne meclis-i şer‘-i şerîf ve mahfil-i dîn-i münîfde Mürtezâ-zâde demekle ma‘rûf merhûm es-Seyyid Abdülmuttalib’in kızı zevci ve mezbûre kıbelinden husûs-ı âtîye ve Mevlânâ Mehmed b. Veli el-İmâm ve Ahmed b. Yusuf nâm kimesneler şehâdetleriyle vekâleti sâbit olan Mevlânâ Muhyiddin Çelebi b. Abdurrahman Çelebi nâm kimesne mahzarında ikrâr ve takrîr-i merâm edip mezbûr Mevlânâ’nın üvey anası ve müvekkile-i mezbûresinin annesinin kız karındaşı olan olup ve benim li eb ve üm ammim kızı olmağla mûrisim olan mezbûr Mevlânâ’nın ve müvekkilesinin evinde fevt olmağla mezbûrlar merkūm mûrisimin muhallefâtına vâzi‘u’l-yed olmağla mâ-beynimizde münâza‘ât-ı kesîre ve muhâsamât-ı şedîde vâki‘ olup mezbûre mûrisimin otuz bin akçe vakfının ve vakfında hâc için vasiyyet eylediği üç bin akçeden ve âzâd eylediği Gülahmer ve Mercan nâm câriyelerin ıtkında nizâ‘ eylemiş idim, hâlâ Mevlânâ-yı mezbûrun yedinden ibrâ muamelesinde on iki bin yüz akçe alıp kabz edip mezbûrun ve müvekkilesinin zimmetlerini cemî‘ da‘vâdan ibrâ-i âmla ibrâ ve ıskāt eyledim ve mûrisimin diğer vakfını kabûl eyledim ve hâc için tayîn ettiğini ve mezbûre câriyelerin ıtkını dahi kabûl eyledim min ba‘d mezbûrlar ile müteveffâ-yı mezbûrun terekesine müte‘allik da‘vâm ve nizâ‘ım yoktur ve eğer edersem dahi lede’l-hükkâm istimâ‘ olunmaya dedikde mukırr-ı mezbûru mezkûr Abdurrahman bi’l-muvâcehe tasdîk edicek mâ-vaka‘a bi’t-taleb kayd olundu. Fî evâsıtı Rebî‘ilâhir sene 971. Şuhûdü’l-hâl: Mevlânâ Muslihiddin b. Süleyman, Mustafa Çelebi b. Mevlânâ Nimetullah, Şeyh Çelebi b. el-Hâc Ferruh, Mustafa b. Nurullah, Şuca‘ b. Muharrem, Mehmed Çelebi b. el-Hâc Mehmed ve gayruhüm Burhan Dede b. Veli, Mustafa Çelebi b. Hamza, Sinan b. Abdullah, Mustafa b. Yakub, el-Hâc Mehmed b. Mustafa el-müezzin, Mevlânâ Ömer Çelebi b. Bahşî