Balat Mahkemesi 2 Numaralı Sicil (H. 970 - 971 / M. 1563) cilt: 11, sayfa: 326 Hüküm no: 525 Orijinal metin no: [95a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Silistre sancakbeyi Mehmed Bey’in ölümü ve muhallefâtının Arslan adlı oğlu tarafından talep edilmesi Bundan akdem Silistre sancağı beyi olup fevt olan Boğdan voyvodası oğlu Mehmed Bey nâm kimesnenin ma‘rûfu’n-neseb oğlu olup lâyık olan sinde bülûğuna mu‘terif olan Arslan nâm bâliğ Dîvân-ı âlî lâ-zâle mehbitan li feyzi’l-bârîye hâzır olup emâcid-i mükerremeyn-i deftereyn katlarında ve hâlâ beytülmâl-i hâssa emîni olan Mustafa Çelebi b. Behmen ve kâtibi olan Derviş Çelebi b. Lütfi mahzarlarında ikrâr ve takrîr-i merâm edip bundan akdem Silistre sancağı beyi olup fevt olan mezbûr Mehmed Bey fevt oldukda bezzâzistânda konulan muhallefâtı mezbûr sene 961[‘de] Hızâne-i âmire’ye teslîm olunmuşdur. Sâbıkan hisse-i şer‘iyyesin kabz etmezden mukaddem fevt olan sagīre Muhsine nâm li eb kız karındaşımın li üm karındaşı Ali’nin Hızâne-i âmire’den yüz kırk beş bin üç yüz otuz altı akçe hissesinden mâ‘adâ şer‘le bana müteveccih olan yedi yüz yirmi altı bin altı yüz seksen beş akçe hakkımı taleb ederim dedikde vukû‘ı üzre pâye-i sa‘âdet-masîre arz olundukda verilmek fermân olundu. Tahrîren fî evâsıtı Rebî‘ilâhir sene 971.