Beşiktaş Mahkemesi 2 Numaralı Sicil (H. 966-968 / M. 1558-1561) cilt: 42, sayfa: 78 Hüküm no: 72 Orijinal metin no: [7b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tomay bt. Yorgi’nin Yani v. Todora’da bulunan yetimlere ait bağı talep ettiği Vech-i tahrîr-i sicil budur ki Karye-i Asamato’dan Tomay bt. Yorgi nâm zimmiyye karye-i mezbûrdan Yani v. Todora nâm zimmîyi meclis-i şer‘-i şerîfe hâzır oldukda da‘vâ kılıp karye-i mezbûrede fevt olan Nemas nâm zimmînin yetimleri Zafira ve Yorgi nâm yetîmlere müteveffâ-yı mezbûrun karye-i mezkûre kurbünde ayazma nâm mevzi‘de bir cânib Todori ve bir cânib Yanko ve iki cânib Kosta bağlarıyla mahdûd olan bağ ki mezbûre Nemas’dan kızlarına irs-i şer‘île intikâl etmişdir vesâyetim tarîkiyle mezkûr Yani’den taleb ederim deyicek mezkûr Yani’den istintāk olundukda inkâr ile cevâb verip benim sâbıkâ baltalığımdır deyu cevâb verdi ba‘de’l-istintāk beyyine taleb olundukda Murad b. Abdullah ve Kosta v. Petro ve Todori v. Mihal ve Yani v. Yorgi nâm kimesneler mezkûrenin da‘vâsına muvâfık şehâdet edip şehâdetleri hayyiz-i kabûlde vâki‘ olup kable’l-karâr yetîmlere hüküm olundu ve fasl-ı husûmet ettikden sonra mezkûre yetîmlerin mülküdür dediği bi’t-taleb sicile kayd olundu. Tahrîren fî 24 Zilka‘de sene 966 Şuhûdü’l-hâl: Nikola Yani, Yorgi v. Dimitri, Dimo v. Yovan, Kosta Duma, Yani Petro.