Beşiktaş Mahkemesi 2 Numaralı Sicil (H. 966-968 / M. 1558-1561) cilt: 42, sayfa: 82 Hüküm no: 85 Orijinal metin no: [9a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Todoroz v. Yorgi’nin bey‘ bi’l-istiğlâl yoluyla Hürrem b. Abdullah’tan ödünç aldığı Sebeb-i tahrîr-i hurûf oldur ki Havâss-ı Kostantıniyye-i mahmiyyeye tâbi‘ Beşiktaşı nâm karyeden Todoroz v. Yorgi nâm zimmî meclis-i şer‘-i şerîfe ve mahfil-i hükm-i münîfe hâzır olduğunda ikrâr kılıp karye-i mezkûre muzâfâtından Kuruçeşme nâm mevzi‘den bir cânib Lanbodi ve bir cânib Nikola Rakaca ve bir cânib tarîk-i âmmla ve bir cânib vâdî ile mahdûd olan bir yer evimi bahçesiyle ve tevâbi‘ levâhıkıyla ve karye-i Beşiktaşı’ndan bir cânib Mihal ve üç cânib tarîk-i âmmla mahdûd olan iki yer evimi bahçesiyle ve hudûd ve levâhık ile işbu bâ‘isü’l-kitâb Hürrem b. Abdullah nâm kimesneye bi-tarîki’l-istiğlâl dört bin akçeye bey‘ edip teslîm-i mebî‘ kabz-ı semen ettim hâliyâ dört yüz akçe icâreye aldım icâre-i mezkûrenin zararına ve hâne-i mezkûrenin zararına kar[ye]-i mezbûreden Hasan b. Abdullah el-berber ve İstemad v. Dimitri ve Mihal v. Nikola nâm kimesne kefîl olup ve mezkûrlar dahi kefâleti kabûl ettikden sonra mezkûr Hürrem talebiyle sicile kayd olundu. Tahrîren fî gurre-i Zilhicce sene 966 Şuhûdü’l-hâl: Şehabeddin Hoca, Ali b. Abdullah, Receb b. Hasan, İbrahim b. Sadık, Kurd el-müezzin.