Beşiktaş Mahkemesi 2 Numaralı Sicil (H. 966-968 / M. 1558-1561) cilt: 42, sayfa: 83 Hüküm no: 86 Orijinal metin no: [9a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dimitri v. İlya’nın Sava Lagori’ye sattığı evin satışının feshedildiği Vech-i tahrîr-i sicil budur ki Beşiktaşı’na tâbi‘ Ayafuka nâm karyeden Sava Lagori nâm zimmî meclis-i şer‘-i şerîfe Dimitri v. İlya nâm zimmîyi ihzâr ettikde karye-i mezkûre sınırında inde’l-ahâlî ma‘lûmü’l-hudûd olan bağ ki Avram v. Todori nâm müteveffadan Erina nâm zimmiyye kızına intikâl etmiş idi büyük babası olan mezkûr Dimitri zarûret deyni için bey‘ etmiş idüp ben de iki bin beş yüz akçeye iştirâ ettim hâliyâ müteveffâ-yı mezkûrun deyni yok ve hüccetimde dahi zarûret deyni yok ben bu bey‘le bu bağı kabûl itmezem deyicek mezkûr Dimitri’den suâl olundukda fi’l-vâki‘ mezkûr bağ ki müteveffâ Avram’dan kalmışdır beni vasî nasb ettiler vesâyetim tarîkiyle zarûret deyni için sattım deyicek vesâyeti sahîh olmayıp karye-i mezkûre ahâlîsinden istifsâr olundukda deyni dahi zuhûr etmeyip sıhhat nâ-meşrû olduğu ecilden feshine hükm olunup mezkûr Sava talebiyle sicile kayd olundu. Tahrîren fî Zilhicce sene 966 Şuhûdü’l-hâl: Sinan Subaşı, Hasan b. Dursun emîn-i mahkeme, Mahmud b. Mustafa el-muhzır, Kosta v. Todori, Kosta Yorgi, Aleksi Kostandi.