Beşiktaş Mahkemesi 2 Numaralı Sicil (H. 966-968 / M. 1558-1561) cilt: 42, sayfa: 89 Hüküm no: 104 Orijinal metin no: [10b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mısır Kadısı Hasan Beyefendi’ye ait olan bahçenin üç yıllık kirasının vekili tarafından alındığı Vech-i tahrîr-i sicil budur ki Hâliyâ Mısır kādısı olan mefharü’l-akrân ve zübdetü’l-a‘yân Hasan Beyefendi cânibinden bi-tarîki’ş-şer‘ vekâleti sâbit olan Hacı Murad b. Abdullah nâm kimesne meclis-i şer‘-i şerîfe ve mahfil-i hükm-i münîfe salâtü’r-rahmân alâ vâzı‘ihi hâzır olup karye-i Ayafuka’dan Canı Nikola nâm zimmî kıbelinde ikrâr edip dedi ki mezkûr efendisinin karye-i mezbûrede inde’l-ahâleti’l-karye ma‘lûmü’l-hudûd olan bahçesini ki bir yılı iki bin sekiz yüz akçe ve iki yılını bin altışar yüz akçesi selâse ve sittîn ve tis‘a mi’e Muharrem gurresinden üç yıl tamâm işbu bâ‘isü’l-hurûf mezkûr Canı’ya mukâta‘aya vermiş idi hâliyâ meblağ-ı merkūm zimmî-i mezbûr zimmetinden beş bin beş yüzünü ve beş yüzünü dahi Hasbahçe ustalarından Mehmed Usta yedinden ki cem‘an altı bin akçe olur vekâletim tarîkiyle bî-kusûr alıp kabz ettim deyicek mukırr-ı mezkûrun ikrârını bi’l-müvâcehe tasdîk edip mezbûr Canı talebiyle sicile kayd olundu. Tahrîren fî 18 Zilhicce sene 966 Şuhûdü’l-hâl: Mehmed Usta, Cafer Ağa, Mevlânâ Ali b. Nebi, Cafer b. Sırrı İmâm, Ahmed Usta, Ferhad b. Abdullah.