Beşiktaş Mahkemesi 2 Numaralı Sicil (H. 966-968 / M. 1558-1561) cilt: 42, sayfa: 101 Hüküm no: 133 Orijinal metin no: [14b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Mansur b. Ahmed’in evinin yarı hissesini Gülahmer bt. Abdullah’a sattığı Vech-i tahrîr-i sicil budur ki Karye-i Beşiktaşı’na tâbi‘ Maçuka nâm karye mahallâtından mahalle-i Ekmekçibaşı’ndan Hacı Mansur b. Ahmed nâm kimesne meclis-i şer‘-i şerîfe ve mahfil-i hükm-i münîfe hâzır olduklarında ikrâr kılıp mahalle-i mezkûrede bir cânibi Hacı Hürrem b. Abdullah mülküne ve bir cânibi Hûbessaray nâm hatun mülküne ve bir cânibi Mevlânâ Hakem Çelebi mülküne ve bir cânibi tarîk-i âmla mahdûd bir yer evimi ve bir enli çardak ve muhavvata ve pınarı ve kenîf ile cemî‘-i tevâbi‘i ve levâhıkıyla ki üç bin akçeye almış idim hâliyâ evin nısfını ve bir çardak ve muhavvatanın yarısını ve su kuyusu nısf-ı şâyi‘i Canım Hüseyin’e iki bin beş yüz akçeye vermiş idim nısf-ı şâyi‘ dahi işbu hâmilü’l-kitâb fahrü’l-emâsil ve’l-akrân İshak Çelebi Efendi el-vekîlü’s-sâbit vekâletühu şehâdeten Hacı İsa b. Mehmed ve Mehmed b. Mahmud nâm kimesneler ile vekâleti sâbit olan Gülahmer bt. Abdullah nâm hatuna iki bin beş yüz râyicü’l-vakt Osmânî akçeye bey‘ edip teslîm-i mebî‘ kabz-ı semen ettim deyicek mukırr-ı mezkûrun ikrârını mu[kar]run lehü’l-mezkûr İshak Çelebi tasdîk edip bi’t-taleb sicile kayd olundu. Tahrîren fî evâsıt-ı Saferü’l-muzaffer sene 967. Şuhûdü’l-hâl: Cafer b. Mir Mehmed el-imâm, Üstâd Veli b. Ömer el-hayyât, Kasım b. Abdullah el-hubarî, Mahmud b. Abdullah el-cündî, Kâtibü’l-hurûf Derviş Mehmed, Mehmed b. Hamza bi-Kalender Çelebi eş-şehîr, Mehmed b. Mustafa el-muhzır, Muslihiddin b. Abdullah ez-zerger