Beşiktaş Mahkemesi 2 Numaralı Sicil (H. 966-968 / M. 1558-1561) cilt: 42, sayfa: 109 Hüküm no: 155 Orijinal metin no: [17b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mısır Kadısı Hasan Beyefendi’ye ait bahçenin Marko v. Mikola’ya mukataaya verildiği Kaziyye-i Hasan Beyefendi Vech-i tahrîr-i hurûf budur ki Hâliyâ Mısır kādısı olan mefharü’l-akrân ve zübdetü’l-a‘yân Hasan Beyefendi cânibinden bi-tarîki’ş-şer‘ vekâleti sâbit olan kendi utekâlarından Nakkâş Hacı Ferruh b. Abdullah nâm kimesne meclis-i şer‘-i şerîfe hâzır olup Ortaköy demekle ma‘rûf nâm karyeden Marko v. Nikola nâm zimmî mahzarında ikrâr-ı şer‘î kılıp dedi ki mezkûr efendinin karye-i mezbûre kurbünde inde ahâleti’l-karye ma‘lûmü’l-hudûd olan bahçesini işbu seb‘a ve sittîn ve tis‘a mi’e Rebî‘ülevveli’nin on beşinden ilâ tis‘a ve sittîn ve tis‘a mi’e Rebî‘ülevveli’nin on beşine varınca mezkûr bahçenin cümle meremmâtından mâ‘adâ her yılın ikişer bin akçeden cem‘an dört bin olur işbu bâ‘isü’l-hurûf mezbûr Marko’ya mukâta‘aya verip ve karye-i mezbûreden Komyonis v. Marko nâm zimmî mezbûr Marko’nun nefsine ve gaybet ederse meblağ-ı mezkûreye kefîl olup mezbûr bahçeyi teslîm ettim dedikde mukırr-ı mezbûrun ikrârını ve kabûl-i meşrûhunu mezbûr Marko ve mezbûr Komyonis vicâhen kabûl ve tasdîk edip mâ-cerâ bi’t-taleb alâ vefki’l-hakîka kayd-ı sicil olundu. Tahrîren fi’l-yevmi’l-hâmis aşer min-Rebî‘ülevvel sene 967. Şuhûdü’l-hâl: Hasan b. Abdullah el-berber, Nasuh Bey b. Abdullah, Sinan Subaşı b. Abdullah, Hasan b. Abdullah, Mehmed b. Mustafa el-muhzır, Todor v. Yorgi, İnoko v. Dimitri ve gayruhüm.