Beşiktaş Mahkemesi 2 Numaralı Sicil (H. 966-968 / M. 1558-1561) cilt: 42, sayfa: 121 Hüküm no: 182 Orijinal metin no: [21b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sinan Paşa Camii etrafındaki meyhânelerin kapatılması hususundaki emrin meyhanecilere tebliğ edildiği Hükm-i şerîf mûcebince meyhâneler dav‘ olmasına hükm olunan sûret-i hüccet budur: Sebeb-i tahrîr-i hurûf budur ki Merhûm ve mağfûr Sinan Paşa nevvera’llâhu merkadehu ve ce‘ale’l-cennete mesvâhûnun Beşiktaşı’nda binâ olunan câmi‘-i şerîf evkāfına mütevellî olan a‘lemü’l-insân zevi’l-izzi ve’ş-şân Keyvan Kethüdâ b. Abdurrahman ve Cafer Ağa b. Abdullah ve câmi‘-i şerîf imâmı ve müezzin ve sâir cemâ‘ati meclis-i şer‘-i şerîfe hâzırûn oldukda mezbûr Keyvan Kethüdâ yessera’llâhû fi’d-dünyâ ve’l-âhire mâ-yeşâ’ takrîr-i kelâm kılıp mezbûr câmi‘-i şerîfin etrâfında meyhâneler olmasın deyu pâdişâh-ı âlem hazretlerinin emr-i şerîfin ibrâz edip mezbûr karyenin meyhânecilerini ve sâir keferesini şer‘-i şerîfe getirtip aranızda meyhâne olmasın ve hamr satıp nâ-mahrem kimesneler ile meclis etmeyiniz hemân kendinize kifâyet mikdârı hamrınız olsun dedikde mezbûr karyenin keferesi dahi biz de aramızda meyhâne olduğunu istemezüz zîrâ ümmü’l-cinâyettir deyu cevâb verdikleri bâ‘isden cümle karyenin ittifâk ile emr-i şerîf muktezâsınca mezkûr câmi‘-i şerîfin etrâfında olan meyhâneler ref‘ olunup kendilere kifâyet mikdârı nevbetce bir fıçı hamr açalar âhar kimesneye satmayalar karye-i mezbûreden Andon b. Lenardi ve Versece b. Yani ve Nikola b. Yani nevbetçe olalar onlar ma‘rifeti olmadan fıçı açmayalar cümle karyenin cemâ‘ati biribirinin üzerine nâzır olalar her hangisi muhâlefet ederse yüz değnek ve beş yüz akçe cerîme alına deyu hükm olunduğu sebebden bu hurûf tesvîd olunup yedlerine verildi ki vakt-i hâcetde ihticâc oluna Tahrîren fî evâil-i Muharremü’l-harâm sene erba‘a ve sittin ve tis‘a mi’e Şuhûdü’l-hâl: Fahrü’l-akrân Cafer b. Veli el-imâm, Cafer Ağa b. Abdullah, Kâtib Nebi b. Hızır, Halil b. Mehmed el-muhzır, İbrahim b. Sadık el-müzzin, Hayreddin b. Doğan, Mehmed b. Mustafa el-muhzır, Ferhad b. Hüseyin, Hamza b. Abdullah ve gayrühüm mine’l-hâzırîn