Beşiktaş Mahkemesi 2 Numaralı Sicil (H. 966-968 / M. 1558-1561) cilt: 42, sayfa: 130 Hüküm no: 204 Orijinal metin no: [24b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yani v. Luka’nın kendisine para vermediğine dair Ergene bt. Manol’un yemin ettiği Vech-i tahrîr-i sicil oldur ki Kuruçeşme’de Yani v. Luka nâm Nasrânî Ergene bt. Manol nâm Nasrâniyye mahfil-i şer‘a ihzâr ve mahzarında takrîr kılıp işbu bâ‘isü hâze’s-sicil Ergene’ye bundan akdem zevci olup fevt olan Yani’nin sermâyesi on dörder filori ve elli altı akçe murâbahadan cem‘an sekiz yüz doksan altı akçe olup merkūm akçeyi bî-kusûr mezbûr Ergene’ye verip teslîm etdim idi hâliyâ müteveffâ-yı mezkûrun eytâm-ı sıgārına kıbel-i şer‘den vasî nasb olunan Çolak Hasan b. Abdullah’dan taleb eder ben dahi bundan taleb ederim deyicek gıbbe’s-suâl mezbûre Ergene inkâr ile cevâb verdikde müdde‘î-i mezbûrun sıdk-ı da‘vâsına mutâbık beyyine taleb olundukda mezbûr Yani beyyineden âciz olup İncîl’e yemîn etsin dedikde mezbûre Ergene’ye İncîl’e yemîn verip fasl-ı husûmet ve kat‘-ı nizâ‘ olduğu mezbûre Ergene talebiyle sicille kayd olundu. Şuhûd: Mehmed b. Mustafa el-muhzır, Çolak Hasan b. Abdullah, Yorgi v. İstemad, Dimitri v. Nikola ve gayruhüm minel-hâzırîn.