Beşiktaş Mahkemesi 2 Numaralı Sicil (H. 966-968 / M. 1558-1561) cilt: 42, sayfa: 130 Hüküm no: 205 Orijinal metin no: [24b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan b. Abdullah’ın Şucâ‘ Bey Vakfı’ndan aldığı borca karşılık olarak evini rehin verdiği Yevmü’s-sebt, fî 7 Kaziyye-i Şucâ‘ Bey Vech-i tahrîr-i hurûf oldur ki Merhûm Şucâ‘ Bey Evkāfı’na bi’l-fi‘il mütevellî olan oğlu İbrahim Çelebi mahfil-i şer‘a hâzır olup Beşiktaşı’ndan Hasan b. Abdullah mahzarında takrîr-i kelâm edip mâl-ı vakıfdan işbu bâ‘isü’l-hurûf Hasan bin akçe nakid ve yüz akçe çuka bedelinden cem‘an bin yüz akçe olup karye-i mezbûrede bir tarafı Sefer Bey mülküne ve bir tarafı Azâb Hasan mülküne ve bir tarafı Mehmed b. Abdullah mülküne ve bir taraf-ı tarîk-i âm ile mahdûd [ve] müntehî mülk evimi cemî‘ tevâbi‘i ile rehin verip meblağ-ı merkūmun derkine karye-i mezbûreden Ahmed b. Abdullah ve Pervâne b. Abdullah ve Mübârek b. Abdullah nâm kimesneler kefîl bi’l-mâl verdim deyicek mukırr-ı mezbûrun ikrâr ve kavl-i meşrûhunu mezbûr Hasan ve mezbûrûn kefîlleri bi’l-müvâcehe bi esrihim kabûl ve tasdîk edip mâ vaka‘a bi’t-taleb kayd olundu. Fi’t-târihi’l-mezbûr Şuhûd: İsmail Çelebi b. Hayreddin, Hâcı Musa b. Hızır, Abdi Çelebi b. Ali, Mehmed b. Hasan, Hasan b. Ali, Ahmed b. Sinan, Mehmed b. Mustafa el-muhzır ve gayruhüm.