Beşiktaş Mahkemesi 2 Numaralı Sicil (H. 966-968 / M. 1558-1561) cilt: 42, sayfa: 143 Hüküm no: 237 Orijinal metin no: [29a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yani v. Dimitri’nin miras hususunda diğer vârislerle sulh olup zimmetlerini ibrâ ettiği Yevmü’l-erbi‘â, fî 25 Vech-i tahrîr-i sicil oldur ki Maçuka nâm karyeden Yani v. Dimitri nâm zimmî meclis-i şer‘a hâzır olup karındaşı Yorgi ve anası Marya bt. Andreya ve kız karındaşı Vasalki kıbel[lerin]den vekîl-i şer‘îsi olan babası Dimitri v. Yani nâm zimmî mahzarında ikrâr-ı şer‘î kılıp bundan akdem fevt olan babamdan bana irsle intikāl eden hakkı cüz’î ve küllî her ne ise iki bin nakd-i râyic fi’l-vakt fıddî akçeye sulh edip meblağ-ı merkūm işbu bâ‘isûnü hâze’s-sicil mezbûr elinden alıp kabûl [ve] kabz etdim elân makbûzumdur bâkī zimmetinlerini ibrâ ve ıskāt etdim dedikde mukırr-ı mezbûrun ikrârını mezbûrlar vicâhen kabûl ve tasdîk edip mâ vaka‘a bi’t-taleb kayd olundu. Şuhûd: İsmail Çelebi b. Hayreddin, Abdi Çelebi b. Ali, Ali Reis b. Abdullah, Ferhad bölükbaşı, Mahmud Bey sipâhî, Hüsam b. Nebî el-muhzır, Mehmed b. Mustafa el-muhzır, Pîrî Çelebi b. Mehmed, İshak kethüdâ, Nikola v. Dimitri ve gayruhüm mine’l-hâzırîn.