Beşiktaş Mahkemesi 2 Numaralı Sicil (H. 966-968 / M. 1558-1561) cilt: 42, sayfa: 143 Hüküm no: 238 Orijinal metin no: [29a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yeniçeri Mehmed b. Şaban’ın Nikola v. Yorgi tarafından düşürülerek yaralandığı Vech-i tahrîr-i sicil oldur ki Beşiktaşı’nda Yeniçeri Mehmed b. Şaban, Nikola v. Yorgi nâm zimmî[yi] mahfil-i şer‘a ihzâr ve mahzarında takrîr-i da‘vâ edip beni kâfir mahallesinden evime gelir iken işbu Nikola kâfir yoluma gelip beni kaldırımdan aşağı düşürüp başımdan dülbendim, düşürdükde kâfiri subaşıya alıp gider iken fırından kâfirlere feryâd edip kâfirler fırından çıkıp beni cebir ile fırın içine koyup muhkem darb-ı şedîd edip başımı yaraladılar şer‘le hakkımı taleb ederim dedikde gıbbe’s-suâl mezbûr Nikola inkâr ile cevâb verdikde da‘vâsına mutâbık beyyine taleb olundukda Müslümanlardan Şaban b. Abdullah ve Hüseyin b. Abdullah müdde‘î-i mezbûrun da‘vâsına mutâbık edâ-i şehâdet-i şer‘iyye işbu müşârun-ileyh Nikola işbu müşârun-ileyh Yeniçeri Mehmed evine gider iken yola gelip yolda kaldırımdan aşağı düşürüp başından düşürdükde subaşı alıp gider iken feryâd edip fırın kâfirleri ile içeri koyup muhkem darb-ı şedîd edip başını yardılar bu husûsa şâhidleriz şehâdet dahi ederiz dediklerinde mezbûrânın şehâdetleri hayyiz-i kabûlde vâki‘ olup ma vaka‘a bi’t-taleb kayd-ı sicil olundu. Tahrîren fi’l-yevmi’l-hâmis ve’l-ışrîn min şehri Cemâziyelevvel sene 967. Şuhûd: İsmail Çelebi b. Hayreddin, Cafer b. Mehmed el-mu‘allim, Hüsam b. Nebî el-muhzır, Pîrî Çelebi b. Ahmed, Ferhad bölükbaşı, İbrahim b. Hayreddin, Abdi Çelebi b. Ali, Mahmud Bey ve gayruhüm mine’l-hâzırîn.