Beşiktaş Mahkemesi 2 Numaralı Sicil (H. 966-968 / M. 1558-1561) cilt: 42, sayfa: 148 Hüküm no: 248 Orijinal metin no: [30b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsteyoko v. Karaoğlan ve Dimitri v. Kosta’nın Sinan Paşa Camii Vakfı’na 2.640 akçe borçları olduğu Vech-i tahrîr-i sicil oldur ki Merhûm ve mağfûrun-leh Sinan Paşa’nın Beşiktaşı’nda binâ olunmuş câmi‘-i şerîf evkāfına hâliyâ mütevellî olan fahrü’l-akrân Kethüdâ Keyvan’ın câbîsi olan Nebî b. Hızır, İsteyoko v. Karaoğlan ve Dimitri v. Kosta nâm kasabları mahfil-i şer‘a ihzâr ve mahzarında takrîr-i da‘vâ kılıp bundan akdem evkāf-ı mezbûre dükkânları ve kanârası ve odası ve âhûrı ve selh[h]ânesi ile yevmî sekizer akçeye icâreye işbu bunlara verilmişdi hâliyâ icâreden iki bin altı yüz kırk [akçe] bâkī-i icâre[yi] vakıf için taleb ederim deyicek gıbbe’s-suâl mezbûrlardan İsteyoko ikrâr-ı tav‘î ile cevâb verip ve mezbûr Dimitri inkâr ile cevâb verip udûl-i müslimînden Mevlânâ Cafer Halîfe b. Pîr Mehmed el-mu‘allim ve Abdi Çelebi b. Ali ve Mahmud Bey b. Abdullah nâm mezbûrlar edâ-i şehâdet-i şer‘iyye edip biz şâhidleriz bi’l-fi‘il işbu mezbûrlar zimmetinde zâhir [ve] mukarrerdir şâhidleriz şehâdet dahi ederiz deyicek mezbûrların şehâdetleri hayyiz-i kabûlde vâki‘ olup mâ vaka‘a bi’t-taleb kayd olundu. Tahrîren fi’l-yevmi’t-tâsi‘ ve’l-ışrîn min-Cumâdelevvel sene 967. Şuhûd: İsmail Çelebi b. Hayreddin, Mevlânâ Mehmed b. Veli el-imâm, Mehmed b. Mustafa el-muhzır, Hüsam b. Nebî el-muhzır ve gayruhüm mine’l-hâzırîn.