Adalar Mahkemesi 1 Numaralı Sicil (H. 1178-1184 / M. 1764-1771) cilt: 75, sayfa: 94 Hüküm no: 97 Orijinal metin no: [21b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kartal ve Pendik taraflarında şiddetli yağmur ve dolu yüzünden harabolan cami ile bozulan cadde ve çeşmeler ile suyollarının acilen tamiri < 356 guruş Hacı Beşir Ağa Kıdvetü’n-nüvvâbi’l-müteşerri‘în Kartal ve Pendik nâhiyeleri nâibleri -zîde ilmühû[mâ]- ve kıdvetü’l-emâsil ve’l-akrân bu husûsa binâ emîni ta‘yîn olunan Ali -zîde kadruhû- tevkī‘-i refî‘-i hümâyûn vâsıl olıcak ma‘lûm ola ki bi-irâdetillâhi te‘âlâ vâki‘ olan şiddet-i bârân ve nüzûl-i dolu takrîbiyle Kartal kasabasında müceddeden binâ ve inşa olunan câmi‘-i şerîfin sakfı ve duvarları münhedim ve pencere camları şikest ve harâba müşrif olduğundan gayrı Pendik ve Maldepe cibâline değin vâki‘ olan cisrler bi’l-külliye münhedim ve derûn-ı Kartal’da vâki‘ dört aded cisrler dahi harâb olup leb-i deryâ olmak hasebiyle vâki‘ olan selden tarîk-i cadde-i kadîme münderis olmakdan nâşî bu makūle vâki‘ olan ta‘mîrâtın keyfiyyeti ma‘lûm olmak içün evvel emir keşfolunmak kavâ‘id-i mîriyeden olduğuna binâen bi’l-fi‘il başdefterdârım Sarim İbrahim -dâme uluvvuhû-nun tarafından ta‘yîn olunan Hasan -zîde kadruhû- ve ma‘iyyetine memûr mi‘mâr halîfesi ma‘rifetleri ve ma‘rifet-i şer‘le keşf ü mu‘âyene olunup gelen müfredât defteri mûcebince ser mimârân-ı hâssa İbrahim -zîde mecdühû- ma‘rifetiyle iktizâsına göre vaz‘ ve hesâb olundukda ta‘mîrât-ı câmi‘-i şerîf ve imlâ-i tarîk-i cadde ile Pendik karyesinde vâki‘ iki aded ahşab cisr ve kaldırımlar ve Maldepe karyesi kurbünde vâki‘ kezâlik ahşab cisr ve kaldırımların mecmû‘ mesârifin beş bin sekiz yüz altmış yedi guruş ve müteveffâ el-Hâc Beşir Ağa’nın çeşmesin su yolları <> ta‘mîrâtı Dârüssa‘âdet-i şerîfem yazıcısı ( ) -zîde mecdühû- ma‘rifetiyle vakfı tarafından emîn-i sâbık İshak’ın iki aded çeşmesinin vakfı olmamakla hâlâ Gümrük Emîni Mehmed Emin -zîde mecdühû tarafından kendü mâlıyla ve zikr olunan câmi‘-i şerîfin ve cisrler ve kaldırımların cânib-i mîrîden ta‘mîr ve tekmîl etdirilmesine irâde-i aliyyem ta‘alluk eylediğine binâen müteveffâ el-Hâc Beşir Ağa’nın ve emîn-i sâbık İshak’ın çeşmeleri suyolları mûmâ-ileyhimâ ma‘rifetleriyle ta‘mîr ve tekmîl etdirilmek üzere başka başka sûretleri verilmekle zikr olunan câmi‘-i şerîf ve cisrler ve kaldırımlar sen ki binâ emîni mûmâ-ileyhsin senden her vecihle sadâkat ve istikāmet memûl ve muntazar olmağla ebniye-i mezkûrların mesârifi olan meblağ-ı mezkûrun kusûru dahi vaktiyle verilmek üzere şimdilik ale’l-hesâb üç bin guruş ber-vech-i nakd hazîne-i âmiremden sana verilmekle ma‘rifetinle bir gün evvel ta‘mîr ve tekmîl olunmak fermânım olmağın hâssaten işbu emr-i âlîşânım ısdâr kılınmışdır imdi vusûlünde ol tarafa vardığında yedine verilen memhûr ve mümzâ sûret-i defterde tahrîr ve takvîm olunduğu üzere ebniye-i mezkûrenin lâzımelerini tedârük ve tehiyye ederek der-akab ta‘mîrâta mübâşeret edüp az vakitde fenâ bulmamak şartıyla metîn ve müstahkem olmak üzere bir gün evvel gereği gibi ta‘mîr ve tekmîl eylemek mezîd-i takayyüd ve ihtimâm ve hilâf-ı emr-i şerîfim bîhûde mahâllere akçe ve mühimmât sarfıyla izâ‘at-i beytülmal-ı Müslimîn eylemekden be-gāyet tehâşî ve mücânebet eyleyesin ve siz ki nâib-i mûmâ-ileyhimâsız sizler dahi mûcib-i emr-i şerîfimle amel ve hareket eylemeniz bâbında fermân-ı âlîşânım sâdır olmuşdur buyurdum ki hükm-i şerîfimle ( ) vardıkda bu bâbda vech-i meşrûh üzere şeref-yâfte-i sudûr olan işbu emr-i şerîf-i celîlü’ş-şân-ı vâcibü’l-ittibâ‘ ve lâzımü’l-imtisâlimin mazmûn-ı itâ‘at-makrûnuyla âmil olup hilâfından ziyâde tehâşî ve mücânebet eyleyesiz şöyle bilesiz alâmet-i şerîfe i‘timâd kılasız. Tahrîren fi’l-yevmi’s-sâdis aşer Cemâziyelâhire ihdâ ve semânîn ve mi’ete ve elf.>>