Adalar Mahkemesi 1 Numaralı Sicil (H. 1178-1184 / M. 1764-1771) cilt: 75, sayfa: 93 Hüküm no: 96 Orijinal metin no: [21a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kartal ve Pendik taraflarında şiddetli yağmur ve dolu yüzünden harabolan cami ile bozulan cadde ve çeşmeler ile suyollarının acilen tamiri Kıdvetü’n-nüvvâbi’l-müteşerri‘în, Kartal ve Pendik nâhiyeleri nâibleri -zîde ilmühûmâ- ve mefâhirü’l-emâsil ve’l-akrân bu husûsa bu def‘a Der-aliyyemden hâssaten mübâşir ta‘yîn olan ( ) ve mimar halîfelerinden ( ) ve a‘yân-ı vilâyet iş erleri -zîde kadruhüm- tevkī‘-i refî‘-i hümâyûn vâsıl olıcak ma‘lûm ola ki Kartal karyesi ahâlîleri tarafından bu def‘a Der-aliyyeme vürûd eden arzuhâlleri mefâhiminden bi-emrillâhi te‘âlâ vâki‘ olan şiddet-i bârân ve nüzûl-i dolu takrîbi ile Kartal karyesinde müceddeden binâ ve inşâ olunan câmi‘-i şerîfin sakfı ve duvarları münhedim ve pencere camları şikest ve harâba müşrif olduğundan gayrı Pendik karyesinden Maldepe cibâline değin vâki‘ olan cisrleri küllî münhedim olduğundan mâ‘adâ derûn-ı Kartal’da vâki‘ dört aded cisrler dahi harâb olup leb-i deryâ olmak hasebiyle vâki‘ olan selden tarîk-i cadde-i kadîme münderis olmakdan nâşî mürûr u ubûr eden ebnâ-i sebîl ve ulaklar reh-nümâ ile zahr-ı karyeden imrâr teklîfine giriftâr olmalarıyla fîmâ-ba‘d münhedim olan cisrler ile münderis olan tarîkin ta‘mîr ve tathîrleri havsala-i vüs‘larından hâric olmadığını ve tarîk-i caddede vâki‘ sâbıkā Dârüssa‘âdeti’ş-şerîfem ağası müteveffâ el-Hâc Beşir Ağa’nın binâ ve icrâ eylediği iki aded çeşme ile sâbıkā gümrük emîni müteveffâ İshak’ın binâ eylediği çeşmenin künkleri ve ba‘zı mahâlleri ta‘mîre muhtâc olmağla karye-i mezbûreden mürûr eden hüccâc-ı Müslimîn ve sâir ebnâ-i sebîle merhameten zikr olunan câmi‘-i şerîf ve tarîk ve cüsûr ve çeşmelerin ta‘mîr ve termîm olunmasını istid‘â eylemeleriyle sen ki mübâşir-i mûmâ-ileyhsin mahâllinde ma‘rifet-i şer‘ ve ma‘rifet ve mübaşeretin ve erbâb-ı vukūf ma‘rifetleriyle kemâ-hüve hakkuhû ve taharrî ederek zikr olunan câmi‘-i şerîf ile cüsûrun ta‘mîrleri ve tarîkin termîmi ve çeşmeler ile su yollarının kezâlik ta‘mîr ve termîmlerini başka başka keşf ü mu‘âyene ve memhûr ve mümzâ defterleri Der-aliyyeme getirmen fermânım olmağın imdi işbu emr-i âlîşânım ile ol tarafa vusûlünde bu makūle vâki‘ olan ta‘mîrâtın keyfiyyeti mesârifinin kemmiyeti ma‘lûm olmak içün evvel emrin keşfolunmak kā’ide-i mer‘iye-i mîriyeden olmağla her hâlde cânib-i mîrî ve evkāf mesârif-ı kesretden sıyânet olunarak zikr olunan câmi‘-i şerîfi başka ve cisrleri başka ve üç aded çeşmelerin dahi muhtâc-ı ta‘mîr olan su yollarını başka başka ma‘rifet-i şer‘ ve ma‘rifet-i mübâşeretin ve sâir erbâb-ı vukūf ma‘rifetleriyle bi’t-taharrî keşf ü mu‘âyene ve alâ-vechi’s-sıhhati başka başka memhûr ve mümzâ keşf defterleri Der-aliyyeme getirmene ihtimâm ve dikkat ve lüzûmu olmayan mahâlleri defter-i keşfe idhâl ile cânib-i mîrîye hasâret[i] mûcib olacak halelden ziyâde tehâşi ve mücânebet eyleyesin ve siz ki Kartal ve Pendik nâibleri mûmâ-ileyhimâ ve sâirlerisiz mûcib-i emr-i şerîfimle amel ve hareket ve zikr olunan câmi‘ ve cisr ve çeşmelerin muhtâc-ı ta‘mîr olan mahâllerini mûmâ-ileyh mübâşeretiyle kemâ-hüve hakkuhû tedkīk ve taharrî ederek başka başka keşf ü mu‘âyene ve memhûr ve mümzâ keşf defterlerini Der-aliyyeme irsâle sizler dahi ihtimâm ve dikkat ve mesârif-ı kesîre îrâsıyla cânib-i mîrîye hasâreti müstelzim olacak hâlâtdan ziyâde tevakkī ve mübâ‘adet eylemeniz bâbında fermân-ı âlîşânım sâdır olmuşdur buyurdum ki hükm-i şerîfimle vardıkda bu bâbda vech-i meşrûh üzere şeref-yâfte-i sudûr olan işbu emr-i şerîf-i celîlü’ş-şân-ı vâcibü’l-ittibâ‘ ve lâzımü’l-imtisâlimin mazmûn-ı itâ‘at-makrûnu ile âmil olup hilâfıyla vaz‘ u hareketden be-gāyet ihtirâz ve ictinâb eyleyesiz şöyle bilesiz alâmet-i şerîfe i‘timâd kılasız. Tahrîren el-yevmi’t-tâsi‘ Cemâziyelevvel li-sene ihdâ ve semânîn ve mi’ete ve elf. <>