Beşiktaş Mahkemesi 2 Numaralı Sicil (H. 966-968 / M. 1558-1561) cilt: 42, sayfa: 214 Hüküm no: 417 Orijinal metin no: [52b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haruşava bt. Yani’nin bazı eşyalarını Yakomine bt. Yani’ye emanet koyduğunu şahitlerle ispat edip iadelerini talep ettiği Yevmü’s-sülâsâ, fî 3 Vech-i tahrîr-i sicil oldur ki Haruşava bt. Yani nâm zimmiyye Yakomine bt. Yani nâm zimmiyyeyi mahfil-i şer‘a ihzâr edip bundan akdem işbu Yakomine’ye bir atlas arakçın ve bir çenber ve bir gömlek bu cümle esbâbları emânet kodum hâliyâ emânetim taleb ederim deyicek gıbbe’s-suâl mezbûre Yakomine inkâr ile cevâb vericek mezbûrenin da‘vâsına mutâbık beyyine taleb olundukda İskender Bey nâm sipâhî ve Server bt. Abdullah ve Aleksandra bt. Yani nâm hatunlar ağzından Ali b. Hamza nâm kimesneler şöyle edâ-i şehâdet-i şer‘iyye edip mezbûr İskender Bey işbu Yakomine mezkûr esbâbı indinde ikrâr etdi şâhidiz şehâdet ederiz dedikde mezbûr Ali mezbûreler ağzından şâhidleriz şehâdet ederiz var efendiye bizim cânibimizden şâhid ola bu husûsa deyu beni şâhid dutdular ol sebeble şehâdet ederiz deyicek mezbûrların şehâdetleri ba‘de’t-tezkiyye ve’t-ta‘dîl hayyiz-i kabûlde vâki‘ olup mâ vaka‘a bi’t-taleb kayd olundu. Tahrîren fî evâili Ramazâni’l-mübârek sene 967. Şuhûd: Ferruh b. Abdullah, Kasım b. Abdullah, Hüseyin b. Abdullah, Hüseyin b. Abdullah, Kasım b. Abdullah, Hasan b. Abdullah, Mehmed b. Mustafa el-muhzır, Papas Yani, Dimitri ve gayruhüm mine’l-hâzırîn.