Adalar Mahkemesi 1 Numaralı Sicil (H. 1178-1184 / M. 1764-1771) cilt: 75, sayfa: 38 Hüküm no: 9 Orijinal metin no: [2a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Pehlivan Mustafa’nın bağını Çömlekçi Ali’ye sattığı Medîne-i Üsküdar’a muzâfe Adalar nâhiyesine tâbi‘ Kartal kasabasında sâkin Pehlivan Mustafa b. Ömer meclis-i şer‘-i hatîrde mahmiye-i İstanbul’da sâkin Çömlekçi işbu bâ‘isü’l-vesîka es-Seyyid Ali b. Ömer mahzarında bi-tav‘ihi ikrâr ve takrîr-i kelâm edüp akd-i âti’z-zikrin sudûruna değin yedimde mülküm olup ze‘âmet toprağında Cevizler nâm mevki‘de vâki‘ bir tarafı Ali Beşe bağı ve bir tarafı Berber Mustafa bağı ve bir tarafı es-Seyyid Hüseyin bağı ve bir tarafı el-Hâc Mustafa veresesi tarlası ve tarîk-i âm ile mahdûd dört bin dört yüz kırk sekiz çubuk kürûmî mülk bir kıt‘a vişne eşcârlı dut ve çavuş bağımı tarafeynden îcâb ve kabûlü hâvî şurût-ı müfsiden ârî bey‘-i bâtt-ı sahîh-i şer‘î ile müşterî-i mezbûra beher çubuğu onar akçeden cem‘an kırk dört bin dört yüz seksen akçeye bey‘ u teslîm ve temlîk eylediğimde ol dahi ber-vech-i muharrer iştirâ ve tesellüm ve temellük ve kabz u kabûl eylediğinden sonra semeni olan meblağ-ı mezkûr kırk dört bin dört yüz seksen akçeyi müşterî-i mezbûr yedinden bi’t-tamâm ve’l-kemâl ahz ü kabz eyleyüp fîmâ-ba‘d mârrü’z-zikr bağda vechen mine’l-vücûh ve sebeben mine’l-esbâb benim kat‘â alâka ve medhalim kalmayup müşterî-i mezbûr es-Seyyid Ali’nin mülk-i müşterâsı ve hakk-ı sırfı olmuşdur keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi 14 Muharrem sene [1]178 Şuhûdü’l-hâl: Ahmed Efendi b. Hasan, Nalband Veli b. Mehmed, Nalband Zekeriya b. Mehmed, Molla Ahmed b. el-Hâc Mustafa, es-Seyyid Ali b. Yusuf, Kulaksız Ali Beşe, Hüseyin Beşe b. Musa, el-Hâc Mehmed b. el-Hâc Mustafa, Helvacı İbrahim Ağa.