Adalar Mahkemesi 1 Numaralı Sicil (H. 1178-1184 / M. 1764-1771) cilt: 75, sayfa: 38 Hüküm no: 10 Orijinal metin no: [2a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halil Beşe’nin evini kayınbiraderi Ahmed Beşe’ye sattığı Medîne-i Üsküdar’a muzâfe Adalar nâhiyesine tâbi‘ Dolayoba nâm karyede sâkin Halil Beşe b. Ahmed meclis-i şer‘-i hatîrde kaynı işbu bâ‘isü’l-vesîka Ahmed Beşe b. Abdullah nâm kimesne mahzarında bi-tav‘ihi ikrâr ve takrîr-i kelâm edüp akd-i câ’i’z-zikrin vukū‘ına değin yedimde mülk ve hakkım olup karye-i mezbûrede vâki‘ bir tarafı vakıf arsa ve bir tarafı benim ambarım ve bahçem ve bir tarafı tarîk-i âm ile mahdûd fevkānî üç bâb oda ve bir sofa ve kenîf ve tahtında ahır ve fırın ve sâye-bend ve benim ambarım tarafından iki buçuk zirâ‘ yukarı avluyu müştemil mülk menzilimi bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile müşterî-i mezbûra iki yüz elli guruşa bey‘ u teslîm ve temlîk eylediğimde ol dahi ber-vech-i muharrer iştirâ ve tesellüm ve temellük ve tesellüm [kabz] ve kabûl eylediğinden sonra semeni olan meblağ-ı mezkûr iki yüz elli guruşun mutâlebesine müte‘allıka âmme-i da‘vâdan kaynım müşterî-i mezbûr Ahmed Beşe’nin zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim fîmâba‘d sâlifü’z-zikr menzilde vechen mine’l-vücûh ve sebeben mine’l-esbâb kat‘â ve kātıbeten benim aslâ medhalim ve alâkam kalmayup kaynım müşterî-i mezbûr Ahmed Beşe’nin mülk-i müşterâsı ve hakk-ı sırfı olmuşdur keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu tahrîren fi’l-yevmi’t-tâsi‘ ve’l-ışrîn min-şehri Rebî‘i’l-evvel li-sene semân ve seb‘în ve mi’ete ve elf. Şuhûdü’l-hâl: Küçük Mehmed Beşe an-karye-i Kurd, Hasan Beşe oğlu İbrahim Beşe, Ahmed b. Süleyman, İbrahim Beşe b. Mehmed Reis, Kalyoncu Mehmed Beşe b. Salih, Serdâr Mehmed Ağa b. Ali, el-Hâc Süleyman, Mehmed Beşe b. el-Hâc Ahmed, Ahmed Efendi b. Hüseyin.