.:: İstanbul Kadı Sicilleri ::.


Anadolu Sadâreti Mahkemesi 2 Numaralı Sicil (H. 1251-1257/ M. 1835-1841)
cilt: 94, sayfa: 131
Hüküm no: 97
Orijinal metin no: [20b-2]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Vefat eden İsmail’in varislerinden Sâbire ve Ali’nin miras hususunda Tokat Müftüsü Ahmed Efendi’den şikâyette bulunmaları

Ma‘rûz,

Sâdır olan fermân-ı âlîlerine imtisâlen işbu arzuhâl ve derkenâra nazar olundukda Anadolu’da Tokad kazâsı ahâlîsinden olup kazâ-i mezkûrede sâkin iken işbu târîhden altı ay mukaddem vefât eden İsmail b. Abdullah’ın verâseti li-ebeveyn kız karındaşı Sâbire nâm hatun ile li-ebeveyn er karındaşı müteveffâ Salih’in sulbî kebîr evlâdı Ali ve Memiş ve Ahmed’e ba‘de’l-inhisâr müteveffâ-yı mezbûr İsmail hayatında kazâ-i mezkûrda Kadirleroğlu mahallesinde Saralıoğlu Hanı demekle arîf ma‘lûmü’l-hudûd bir bâb vakıf han arsası üzerine izn-i mütevellî ve kendi malıyla nefsi için müceddeden binâ ve inşâ eylediği bir kıt‘a han ebniyesi ber-vech-i mülkiyet hayatında ile’l-vefât müstakıllen yedinde mülkü olup ba‘de vefâtihî nısfı karındaşı mezbûre Sâbire Hatun’a ve bâkīsi dahi karındaşı oğulları merkūmûna mevrûs olmuş iken hâlâ kazâ-i mezkûr müftüsü bulunan Ahmed Efendi Han-ı mezkûrun arsa ve ebniyesinin mecmû‘u kazâ-i merkūm müftüsü bulunanlara meşrûta vakıfdır deyü bi-gayr-ı hakkın fuzûlî müdâhalesinden bahisle işbu arzuhâle merbût [21a] olan fetvâ-yı şerîfeler mantûklarınca müfti-yi mûmâ-ileyhin ber-vech-i muharrer müdâhalesinin men‘ ü def‘i bâbında Sivas vâlîsi ve hâkimine hitâben bir kıt‘a fermân-ı âlîşân sudûrunu verese-i merkūmûndan mezbûre Sâbire Hatun ile merkūm Ali’den her biri istid‘â ve istirhâm etmiş oldukları meâl-i istid‘âdan ve husûs-ı mezkûre mahâllinde muhassıl ve a‘zâ-yı meclis ma‘rifetleriyle rü’yet ve tesviyesi tanzîmât-ı hayriye usûl-i mehâsin-şümûlü müteferri‘âtından bulunmuş ve mûmâ-ileyh Ahmed Efendi el-yevm me’zûn-ı bi’l-iftâ bulunmak mülâbesesiyle işâret-i aliyye-i hazret-i Şeyhülislâmîye mütevakkıf olduğu derkenâr-ı mezkûr müfâdından müstebân olmağın bu sûretde müfti-yi mûmâ-ileyhin minvâl-i muharrer üzere müdâhalesi ber-mûceb-i fetvâ-yı şerîfe vâki‘ ise ber-vech-i istid‘â mahâllinde tarafeyn bi’l-muvâcehe terâfu‘-i şer‘-i şerîf ve ihkāk-ı hak olunması bâbında bâ-işâret-i aliyye-i bâhiretü’l-beşâre fermân-ı âlîşân sudûru re’y-i rezîn-i isâbet-karîn-i âsafânelerine menût mevâddan idüğü huzûr-ı âlîlerine i‘lâm olundu.

Fî 27 C sene [12]56.