|
Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 132 Hüküm no: 98 Orijinal metin no: [21a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Ali b. Mustafa’nın Abdulkadir Ağa aleyhindeki alacak iddiasında anlaşma sağlanması
Hâmiş-i arzuhâlde mastûr Mahmudpaşa Mahkemesi’nden verilen işbu bir kıt‘a mazbata i‘lâmında mezkûrü’l-ism es-Seyyid Ali b. Mustafa nâm kimesne Bâb-ı hazret-i fetvâ-penâhîde sadâret-i Anadolu mutasarrıfları dâ‘îlerine tahsîs buyurulan dâirede ma‘kūd meclis-i şer‘-i münîrde derûn-ı i‘lâm-ı mezkûrda kezâlik ismi mezkûr el-Hâc Abdulkadir Ağa b. el-Hâc Mehmed Emin nâm kimesne muvâcehesinde derûn-ı i‘lâm-ı mezkûrda tafsîl ü beyân olunduğu üzere mezbûr el-Hâc Abdulkadir Ağa zimmetinde bundan akdem malımdan ve yedimden iktirâz ve umûruna sarfla istihlâk eylediği iki yüz guruş ile malımdan ve yedimden iştirâ ve kabz eylediği altı aded kilim semeninden dört bin altı yüz yirmi guruş ki cem‘an dört bin sekiz yüz yirmi beş guruş alacak hakkımın iki bin iki yüz guruşu mukābele merkūm el-Hâc Abdulkadir Ağa malından bir çuka kaput ve bir çuka biniş ve bir çuka şalvar ve üç aded çuka cübbe ve bir çuka-i Frengî ve iki saltamarkayı safka-i vâhide ile bana bey‘ ü temlîk ve teslîm eylediğinden ben dahi ber-vech-i muharrer iştirâ ve temellük ve tesellüm ve ol vechile alacağım olan meblağ-ı mezkûr dört bin sekiz yüz yirmi beş guruşun meblağ-ı merkūm iki bin iki yüz guruşu mezbûr el-Hâc Abdulkadir Ağa’dan istîfâ etmemle bâkīsi olan iki bin altı yüz yirmi beş guruşu merkūm el-Hâc Abdulkadir Ağa’dan hâlâ taleb ederim deyü da‘vâ eylediğimde ol dahi cevâbında kaziyye minvâl-i muharrer üzere olup meblağ-ı bâkī-i mezkûr iki bin altı yüz yirmi beş guruş bana deyni olduğunu ikrâr, lâkin benim senin zimmetinde eşyâ-i muharrere-i mezkûrdan mâ‘adâ bundan akdem malımdan ve yedimden bi-safkatin vâhidetin iştirâ ve kabz eylediğin on kehribar çubuk takımı ve üç çuka şalvar ve bir çuka cübbe ve sekiz çuka saltamarka ve Üsküdar basması seksen dokuz değirmi yemenî semenlerinden dört bin dokuz yüz guruş alacak hakkım olmağla meblağ-ı mezkûr dört bin dokuz yüz guruşun iki bin altı yüz yirmi beş guruşu deyn-i bâkī-i mezkûruma takās olunup bâkīsi olan iki bin iki yüz yetmiş beş guruşu taleb ederim deyü inkârıma mukārin benden da‘vâ ve ol vechile beynimizde ba‘de vukū‘i’l-münâza‘a muslihûn tavassutuyla beynimiz ıslâh ve tanzîm olunup ben tasaddî eylediğim da‘vâ-yı mezkûremden mezbûre el-Hâc Abdulkadir Ağa ile bi’t-tav‘ ve’r-rızâ bin beş yüz guruş üzerine sulh olduğumda, ol dahi sulh-ı mezkûru ba‘de’l-kabûl mâ‘adâya ve bi’l-cümle husûs-ı mezkûra ve işbu târîh-i i‘lâma gelince sâir cemî‘ hukūk-ı şer‘iyyeye müte‘allika âmme-i de‘âvîden merkūm el-Hâc Abdulkadir Ağa’nın zimmetini, ol dahi inkârıma mukārın benden iddi‘â eylediği meblağ-ı mezkûr dört bin dokuz yüz guruş da‘vâsından rızâsıyla meccânen fâriğ olup meblağ-ı mezkûr dört bin dokuz yüz guruş mutâlebe ve işbu târîhe gelince sâir cemî‘ hukūk-ı şer‘iyyeye müte‘allika âmme-i da‘vâdan benim zimmetimi her birimiz ibrâ-i âmm-ı sahîh-i şer‘î ile ibrâ ve iskāt ve her birimiz ber-vech-i muharrer âharın ibrâsını kabûl eyledik dediğini mezbûr el-Hâc Abdulkadir Ağa tasdîk ve ber-vech-i meşrûh kabûlü hâvî ibrâ eylediğini ve ibrâdan müstesnâ bedel-i sulh-ı merkūm bin beş yüz guruş zimmetinde müdde‘î-i mezbûra sahîhan deyni olduğunu tâyi‘an ve kat‘iyyen ikrâr ü i‘tirâf etmeğin alâ-mûcebi i‘tirâfihî bedel-i sulh-ı mezkûr bin beş yüz guruşun müdde‘î-i mezbûr es-Seyyid Ali’ye edâ ve teslîmiyle mezbûr el-Hâc Abdulkadir Ağa ilzâm olunduğu huzûr-ı âlîlerine i‘lâm olundu.
Fî 24 C sene [1]256.
|