|
Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 130 Hüküm no: 96 Orijinal metin no: [20b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Hafız Mehmed’in, Mehmed ve Salih’ten mirastan hisse talebi
Ma‘rûz,
Sâdır olan fermân-ı âlîlerine imtisâlen işbu arzuhâle nazar olundukda Anadolu’da Trabzon sancağında Rize kazâsı ahâlîsinden olup kazâ-i mezkûrda sâkin iken bundan akdem vefât eden Mataracıoğlu Hüseyin b. Abdullah nâm kimesnenin verâseti zevce-i menkûha-i metrûkesi Havva Hatun ile sulbiye kebîre kızları Hafize ve Fâtıma ve li-ebeveyn er karındaşı oğlu sâhib-i arzuhâl el-Hâc Hafız Mehmed’e münhasıra ba‘dehu bint-i mezbûre Hafize Hatun dahi vefât edip verâseti zevc-i metrûku Tuzcuzâde el-Hâc Memiş Ağa ile sadrî kebîr oğlu Ahmed’e münhasıra ba‘dehâ bint-i merkūme Fâtıma dahi vefât edip verâseti zevce-i metrûku Çelebizâde el-Hâc Ömer Ağa ile sadrî kebîr oğlu Mutahhar’a münhasıra, ba‘dehâ ibn-i mezbûr Ahmed dahi vefât edip verâseti zevce-i menkûha-i metrûkesi diğer Havva Hatun ile sulbî kebîr oğlu Mehmed’e münhasıra ba‘dehu ibn-i merkūm Mutahhar dahi vefât edip verâseti zevce-i menkûha-i metrûkesi Âişe Hatun ile sulbî kebîr oğlu Saliha ba‘de’l-inhisâr kazâ-i mezkûrda çarşı derûnunda vâki‘ Uzun Han demekle arîf her biri ma‘lûmü’l-hudûd iki bâb mülk han ve on beş aded mülk dekâkîn ve iki kıt‘a mülk ekmekçi fırınları ve bir bâb mülk kahve dükkânı ve Harem demekle meşhûr bir bâb mülk menzil müteveffâ-yı evvel-i mezbûr Mataracıoğlu Hüseyin’in hayatında ile’l-vefât her biri müstakıllen yedinde emlâki olup ba‘de vefâtihî mezbûrûn Havva Hatun ve el-Hâc Hafız Mehmed ve el-Hâc Memiş Ağa ve el-Hâc Ömer Ağa ve diğer Havva Hatun ve Mehmed ve Âişe Hatun ve Salih’den her birine bi-tarîkı’l-münâsaha mevrûs olmuş ise de emlâk-ı muharrere-i mezkûrede müteveffâ-yı evvel-i mezbûrun li-ebeveyn er karındaşı oğlu sâhib-i arzuhâl merkūm el-Hâc Hafız Mehmed’in hisse-i irsiyesini merkūmân Mehmed ve Salih’den her biri bi-gayr-ı hakkın zabt ve vaz‘-ı yed etmiş olduklarından bahisle emlâk-ı muharrere-i mezkûreye vâzı‘ayi’l-yed olan mezbûrân Mehmed ve Salih ile mahâllinde huzûr-ı şer‘de bi’l-muvâcehe terâfu‘-i şer‘-i şerîf ve ihkāk-ı hak olunması bâbında livâ-i mezkûr velî ve hâkimine hitâben bir kıt‘a fermân-ı âlîşân sudûrunu sâhib-i arzuhâl merkūm el-Hâc Hafız Mehmed niyâz ve istirhâm eylediği meâl-i istid‘âdan müstebân olmağın bu sûretde ber-vech-i istid‘â fermân-ı âlîşân sudûru re’y-i rezîn-i isâbet-karîn-i âsafânelerine menût mevâddan idüğü huzûr-ı âlîlerine i‘lâm olundu.
Fî 23 C sene [1]256.
|