Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 138 Hüküm no: 100 Orijinal metin no: [22b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Arif Ağa’nın vefat eden Abdullah Efendi’ye olan borcunu varislerine taksitle ödemesi Ma‘rûz, Üsküdar’da Eski Vâlide Câmi‘-i şerîfi kurbünde Debbâğlar mahallesinde fevt olan es-Seyyid el-Hâc Abdullah Efendi b. Ahmed’in verâseti zevceleri Salih Hanım bt. el-Hâc Ahmed ve Necibe Kadın bt. Abdullah ve kebîre kızı Şerife Hadice Hanım ve li-ebeveyn er karındaşı es-Seyyid el-Hâc Osman Ağa’ya ba‘de’l-inhisâr müteveffâ-yı mezbûrun medyûnu es-Seyyid el-Hâc Mehmed Ârif Ağa cânib-i şerî‘at-ı garrâdan mürsel kâtib es-Seyyid el-Hâc Mehmed Said Efendi dâ‘îlerinin mahalle-i mezbûrede vâki‘ müteveffâ-yı mezbûrun ile’l-vefât sâkin olduğu menzilde cerîdede mazbûtü’l-esâmî Müslimîn huzûrlarında akdeylediği meclis-i şer‘-i münîrde mezbûrât Saliha Hanım ve Necibe Kadın ve Şerife Hadice Hanım taraflarından vekîl-i müseccel-i şer‘îleri mezbûr es-Seyyid el-Hâc Osman Ağa muvâcehesinde benim müteveffâ-yı mezbûre ba‘de külli’l-hesâb cihet-i şer‘îden deynim olan yirmi bin iki yüz elli bir buçuk guruşun yedi bin beş yüz guruşunu mukaddemâ asîl-i vekîl-i mezbûr es-Seyyid el-Hâc Osman Ağa’ya def‘ ü teslîm ol dahi yedimden ahz u kabz edip bâkī on iki bin yedi yüz elli bir buçuk guruşu hâlâ def‘aten edâya iktidârım olmamağla beş bin guruşunu târîh-i i‘lâmdan altmış bir gün mürûrunda ve yedi bin yedi yüz elli bir buçuk guruşu doksan bir gün mürûrunda asıl ve vekîl-i mezbûra mukassatan edâya ta‘ahhüd eylediğimde ol dahi râzı ve kabûl eyledi deyü ba‘de’l-ikrâr ve’t-tasâduk Hayriye Tüccârı’ndan el-Hâc Ahmed Efendi b. Abdulkadir meclis-i ma‘kūd-ı mezkûrda asîl ve vekîl-i mezbûr es-Seyyid el-Hâc Osman Ağa muvâcehesinde medyûn-ı mezbûr es-Seyyid el-Hâc Mehmed Ârif Ağa hâzır olduğu hâlde hâzır-ı mezbûrun zimmetinde asîl ve vekîl-i mezbûrûna mukassatan edâsı vâcib deyni olan meblağ-ı mecmû‘-ı merkūm on iki bin yedi yüz elli bir buçuk guruşa tarafeynden bi’l-emr ve’l-kabûl kefâlet-i mutlaka-i sahîha-i şer‘iyye ile ben dahi kefîl bi’l-mâl ve zâminim dediğini kâtib-i mezbûr dâ‘îleri mahâllinde tahrîr ve ma‘an mürsel ümenâ-i şer‘le meclis-i şer‘a gelip alâ-vukū‘ihî inhâ ve takrîri tescîl ve huzûr-ı âlîlerine i‘lâm olundu. Fî-gurreti M sene [1]256.