Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 138 Hüküm no: 101 Orijinal metin no: [22b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Sultaniye Bekçisi İsmail Ağa’nın küçük çocukları Mahmud ve Zahide’ye nafaka tahsis olunması Medîne-i Üsküdar-ı meymenet-âsâra muzâfe Yoros nâhiyesine tâbi‘ İncir karyesinde sâkin iken bundan akdem vefât eden Sultaniye Bekçisi İsmail Ağa b. Mahmud’un sulbiye sagīre kızı Şerife Zahide ve sulbî sagīr oğlu es-Seyyid Mahmud’un vâlideleri ve tesviye-i emirlerine vasiyy-i mansûbeleri işbu bâ‘isetü’l-kitâb Şerife Feride Hanım bt. es-Seyyid Mustafa talebiyle hâkim-i hâsim-i vâlâ cenâbi’l-muvakkı‘ ismihî fî-sadri’l-kitâb -vaffakallâhu te‘âlâ ilâ-sebîli’s-savâb- efendi hazretleri sagīrân-ı mezbûrânın mâlları nemâsından işbu târîh-i kitâbdan kadr-ı ma‘rûf idüğü ihbâr olunan beher şehr sagīr-i mezbûr es-Seyyid Mahmud’a yüz yirmi guruş ve sagīre-i mezbûre Şerife Zahide’ye altmış guruş ki cem‘an yüz seksen guruş nafaka ve kisve-bahâ farz ve takdîr buyurup meblağ-ı mefrûz-ı mecmû‘-ı mezkûr beher şehr yüz seksen guruşu sagīrân-ı mezbûrânın nafaka ve kisve ve sâir levâzım-ı zarûriyelerine harc ü sarfa ve vakt-i hâcetde istidâneye ve lede’z-zafer sagīrân-ı mezbûrânın malları nemâsına rücû‘a vasiyy-i mezbûre Şerife Feride Hanım’a izin vermeğin mâ-vak‘a bi’t-taleb ketb olundu. Fî-gurreti S sene [1]256. Şuhûdü’l-hâl: es-Seyyid Mehmed Nazif Efendi, Küçük Ali Ağa b. Mehmed tâbi‘-i muhzır, Muhzır yamağı es-Seyyid Ali Ağa b. İsmail.