Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 139 Hüküm no: 102 Orijinal metin no: [22b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sarraf Melkon’un küçük çocuklarına menzil bedelinden borcu olduğunu ikrar etmesi Medîne-i Üsküdar-ı meymenet-âsâra muzâfe Kandilli karyesinde hâlike olan Paris bt. Canik Nasrâniyenin asıl defteri beş varaka kayd olunmuşdur. Fî-gurreti C sene [12]56. Karye-i mezbûrede vâki‘ bir bâb vakıf menzilin nısfı derûn-ı defterde mastûretü’l-ism hâlike Paris Nasraniyenin ile’l-helâk bi’l-icâreteyn taht-ı tasarrufunda olup ba‘de helâkihâ evlâd-ı sıgārı Takohi ve Derohi ve Kirkor’a intikāl-i âdî ile ba‘de’l-intikāl sıgār-ı mersûmûnun babaları ve velîleri mersûm Sarrâf Melkon zimmî nısf menzil-i mezkûru mesûğ-ı şer‘îye binâen bâ-ma‘rifet-i mütevellî muhammen tahmînleriyle hâlâ Ebniye-i hâssa Müdürü sa‘âdetlü Abdülhalim Efendi’nin memhûren pusulası mûcebince ihbâr olunan elli bin guruş bedel mukābelesinde bi’l-velâye âhara ferâğ ve tefvîz ve bedeli olmak üzere sıgār-ı mersûmûna teberru‘ ve ibrâ-i zimmet olunan meblağ-ı merkūm elli bin guruşu veliyy-i mersûm Melkon zimmî bi’l-velâye kabz ve bilâ-zarûretin kendi umûruna sarfla istihlâk edip zimmetinde sıgār-ı mersûmûna vâcibü’l-edâ deyni olduğunu ba‘de’l-ikrâr emriyle derûn-ı defterde isimleri mastûr küfelâdan Karabet ve Serkiz ve Bedros zimmîlerden her biri meblağ-ı merkūm elli bin guruşa kefâlet-i mutlaka-i sahîha-i şer‘iyye ile her biri müte‘âkiben kefîl bi’l-mâl ve zâmin olduklarında vasiyy-i mezbûr Mehmed Ağa dahi kefâlet-i merkūmeyi ba‘de’l-kabûl veliyy-i mersûm Melkon zimmî sıgār-ı mersûmûnu kendi malından infâk ve iksâya ta‘ahhüd eylediği işbu mahalle zeyl olundu. Fî 15 B sene [1]256.