Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 140 Hüküm no: 103 Orijinal metin no: [23a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sofya ve eşi Gabril’in, Kadıköyü’nde Maryano’nun evine bitişik bağları için açmış oldukları yolun kapatılması Ma‘rûz, Sâdır olan fermân-ı âlîlerine imtisâlen zikri âtî husûsun mahâllinde bi’l-mu‘âyene keşf ve tahkīki için savb-ı şer‘-i enverden me’zûnen irsâl olunan Başkâtib es-Seyyid Abdulkadir Efendi bi’l-ma‘iyye rü’yete memûr evkāf müfettişi mevâlî-i i‘zâmdan fazîletlü es-Seyyid Mehmed Emin Âsaf Beyefendi tarafından meb‘ûs Kâtib es-Seyyid el-Hâc Hasan Efendi Ebniye-i hâssa Müdürü Efendi tarafından mürsel Derviş Ahmed ve Ahmed Şevki halîfeler ve Üsküdar Muhâfızı sa‘âdetlü Necib Ağa tarafından mürsel Rıf‘at Efendi ile Hazîne-i celîle-i Evkāf’a mülhak evkāfdan Sadrıa‘zam-ı esbak merhûm İzzet Mehmed Paşa Vakfı musakkafâtından medîne-i mezkûreye tâbi‘ Kādı karyesinde leb-i deryâya nâzır sed üzerinde kâin ma‘lûmü’l-hudûd bir bâb menzile varıp cerîdede mazbûtü’l-esâmî Müslimîn huzûrlarında akd-i meclis-i şer‘-i nebevî etdiklerinde menzil-i mahdûd-ı mezkûra bâ-temessük-i mütevellî bi’l-icâreteyn müstakılleten mutasarrıf olan sâhibe-i arzuhâl şahs-ı mu‘arrefe Maryana bt. Filibos Nasrâniye meclis-i ma‘kūd-ı mezkûrda menzil-i mahdûd-ı mezkûra muttasıl yine hazîne-i müşârün-ileyhe mülhak evkāfdan merhûm Ali Âlî Efendi Vakfı musakkafâtından bir tarafdan menzil-i mezkûr ve bir tarafdan Çamurcuoğlu bağı ve bir tarafdan Vekîlharc Ahmed Ağa bağı ve taraf-ı râbi‘i sedd-i mezkûr üzerinde kâin halîfetân-ı mezbûrân misâhalarıyla iki zirâ‘ arzında olup piyâde tarîki ta‘bîr olunur tarîk-i âm ile mahdûd bir kıt‘a bağa bâ-temessük-i mütevellî bi’l-icâreteyn münâsafeten mutasarrıflar olan kendi nefsinden asîl ve zevcesi Sofya bt. Bedros Nasrâniye tarafından husûs-ı âtîde vekîl-i müseccel-i şer‘îsi kuyumcu esnâfından derûn-ı arzuhâlde mastûrü’l-esâmî Gabril v. Serkiz zimmî muvâcehesinde sâlifü’z-zikr İzzet Mehmed Paşa Vakfı’nın bi’l-meşrûta mütevellîsi es-Seyyid Mehmed Emin Efendi ile mârru’z-zikr Ali Âlî Efendi Vakfı’nın kezâlik bi’l-meşrûta mütevelliyesi Cemile Hatun bt. el-Hâc Mehmed tarafından mürsel vekîlleri câbî-i vakfeyn-i mezkûreyn Hüseyin Hüsnü Efendi b. el-Hâc Ali hâzır olduğu hâlde asıl ve müvekkile zevcân-ı mersûmânın mutasarrıflar oldukları bağ-ı mahdûd-ı mezkûrun kapısı mutasarrife olduğum menzil-i mezkûrumun duvarına muttasıl olmak takrîbiyle zevcân-ı asıl ve müvekkil-i mesfûrânın sâlifü’l-beyân mutasarrıflar oldukları bağlarına kadîmden beri menzil-i mezkûrumun duvarı ile sedd-i mezkûr beynlerinde kâin tarîk-i âmm-ı mezkûrdan duhûl ve hurûc olunagelir iken asıl ve müvekkile zevcân-ı mersûmân kadîmî olan tarîk-i âmm-ı mezbûru terk ile bağ-ı mahdûd-ı mezkûrun kapısı pîş-gâhından sedd-i mezbûru hafr ve ref‘ birle sâhil-i bahra müceddeden araba tarîki misillü tarîk ihdâsına şurû‘ etmişler ise de evvelen müceddeden tarîk inşâsı bâ-emr-i âlî memnû‘âtdan olduğundan mâ‘adâ sedd-i mezkûr hafr ile ref‘ olunduğu takdîrce mutasarrıfe olduğum menzil-i merkūmun duvarına vehn-târî olarak külliyen hedmle mazarratı bi’l-mu‘âyene zâhir ve âşikâr olduğuna mebnî asıl ve müvekkile zevcân-ı mesfûrân kadîmden olageldiği vech üzere tarîk-i âmm-ı mezkûrdan mürûr ve ubûr ile ber-minvâl-i muharrer müceddeden tarîk ihdâsından fâriğler olmak üzere asıl ve vekîl-i mersûm Gabril zimmîye tenbîh olunmak matlûbumdur deyü da‘vâ etdikde asıl ve vekîl-i mesfûr dahi cevâbında kaziyye minvâl-i meşrûh üzere olduğunu ikrâr ve tasdîk edip ancak bağ-ı mahdûd-ı mezkûrun kadîmî olan tarîk-i mezbûru araba tarîki olmayıp araba ile mürûr ve ubûr olunamayacağına mebnî ber-minvâl-i muharrer sâhil-i bahra müceddeden araba yolu olmak üzere tarîk-i mezkûrun ihdâsına şurû‘ ederim deyü eylediği takrîrini kâtib-i mezbûrân mahâllinde ketb ü tahrîr ve ma‘an meb‘ûs ümenâ-i şer‘le Bâb-ı hazret-i fetvâ-penâhîde sadâret-i Anadolu mutasarrıfları dâ‘îlerine tahsîs buyurulan dâirede ma‘kūd meclis-i şer‘-i şerîfe gelip tarafeyn ve câbî-i vekîl-i mezbûr ile halîfetân-ı merkūmândan her biri bi-ecma‘ihim hâzır oldukları hâlde tasdîklerine mukārin alâ-vukū‘ihî ba‘de’l-inhâ ve’t-takrîr asîl ve vekîl-i mesfûr Kabril zimmînin eylediği takrîr-i mezkûru şer‘an müvecceh ve mültefet olmadığından mâ‘adâ bu makūle müceddeden tarîk inşâsı bâ-fermân-ı âlî memnû‘âtdan olup tarîk-i mezkûr ihdâs olunduğu sûretde duvar-ı mezkûra vehn târeyânıyla mazarratı derkâr olunduğunu halîfetân-ı mezbûrâtdan her biri dahi bi’l-muvâcehe alâ-tarîkı’ş-şehâde haber vermeleriyle bu sûretde asıl ve vekîl-i mesfûr Gabril zimmî bağ-ı mahdûd-ı mezkûrun kadîmî olan tarîk-i âmm-ı mezkûrdan mürûr ve ubûr ile ber-vech-i muharrer müceddeden tarîk ihdâsından ferâğa asıl ve vekîl-i mersûm Gabril zimmîye tenbîh olunduğu tescîl ve huzûr-ı âlîlerine i‘lâm olundu. Fî 21 Ca sene [1]256.