Beşiktaş Mahkemesi 2 Numaralı Sicil (H. 966-968 / M. 1558-1561) cilt: 42, sayfa: 262 Hüküm no: 534 Orijinal metin no: [69a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Süleyman’ın Dimitri v. Pavli’den satın aldığı yerin eksik çıkması üzerine satışın iptal edildiği Vech-i tahrîr-i sicil budur ki Havâss-ı Kostantınıyye-i mahmiyye’ye tâbi‘ Beşiktaş nâm karyeye tâbi‘ Arnavudköy nâm karyeden Dimitri v. Pavli nâm zimmîyi Yenihisar’dan Âişe bt. Süleyman nâm hatun meclis-i şer‘-i şerîfe ihzâr etdikde da‘vâ kılıp karye-i Kuruçeşme’den bir cânib dağ ve bir cânib deryâ ve bir cânib Atnas mülküyle ve bir cânib Hasan es-sâ‘î mülküyle mahdûd olan yeri üç evlek yer deyu altı bin akçeye bey‘ edip kabz-ı semen ve teslîm-i mebî‘ etmiş idim ol zamanda zirâ‘layıp almadım kendilerin kavline i‘timâd etdim hâliyâ bey‘ etmek murâd edicek hâssa-i hümâyûn mi‘mârlarından mi‘mârbaşı olan Sinan Ağa ma‘rifetiyle Üstâd Kasım gelip ölçüp bennâ zirâ‘ıyla dokuz yüz on sekiz zirâ‘ çıkıp yedi yüz elli zirâ‘ bir evlek bir olup ol hesâb üzere bir evlek yüz altmış sekiz zirâ‘ olucak noksân-ı arzı taleb ederim deyicek mezkûr Dimitri’den suâl olundukda ikrâr edip üç evlek yer ikişer bin akçeden altı bin akçeye satdım teslîm-i mebî‘, kabz-ı semen etdim lâkin cümle-i arz biz üç evlek sanırdık eksik olucak ol yerde bâğ kütükleri var idi geri kütükleri yerine kosun veyâhud bahâsı ta‘yîn olsun biz geri vermesini kabûl ederiz bâkī akçesin teslîm edelim deyicek mezkûre Âişe talebiyle sicille kayd olunup mezkûr yer Dimitri’ye ve meblağ-ı merkūm Âişe’ye hükm olunup altı gün mehil verilip meblağ-ı merkūmun edâsına karye-i Asamato’dan Murad b. Abdullah el-mütekā‘id ani’r-râcil kefîl olup sicil olundu. Tahrîren fî evâhiri Saferi’l-muzaffer min şuhûri sene seb‘a ve sittîn ve tis‘a mi’e. Şuhûd: Mehmed b. Mustafa el-muhzır, Kasım b. Abdullah el-mi‘mâr, Murad b. Abdullah er-râcil, Ali b. Selim, Sinan el-mübâşir fî Beşiktaş, Manol v. Nikola, İstemad v. Nikola ve gayruhüm mine’l-hâzırîn.